2:27  INSTITUTIO  REL.  CHRIST.  1559.  satis  est,  ita  rursum  aliorum  imbecillitati  occurrendum,  quos  talibus  offendiculis  commoveri  ac  perturbatos  vacillare  non  raro  contingit.  Illi  vero  ne  hac  perturbatione  labascant,  ac  de  gradu  deiiciantur,  sciant  eadem  expertos  esse  suo  saeculo  apostolos  quae  nunc  usu  nobis  veniunt.  Erant  indocti  et  instabiles,  qui  ad  suam  ipsorum  perniciem  depravarent  quae  a  Paulo  divinitus  scripta  erant,  ut  ait  Petrus  (2  Petr.  3,  16).  Erant  Dei  contemptores,  qui,  quum  audiebant  abundasse  peccatum  ut  gratia  exundaret,  statim  ingerebant  :  manebimus  in  peccato,  ut  gratia  abundet;  quum  audiebant  fideles  non  esse  sub  lege,  protinus  occinebant:  peccabimus,  quia  non  sumus  sub  lege,  sed  sub  gratia  (Rom.  6,1.  15).  Erant  qui  illum  mali  suasorem  arguebant.  Subintrabant  multi  pseudoapostoli,  qui  diruerent  ecclesias  quas  ipse  aedificaverat.  Quidam  per  invidiam  et  contentionem,  nec  sincere  evangelium  praedicabant,  malitiose  etiam  cogitantes  se  pressuram  suscitare  vinculis  eius  (Phil.  1,  15).  Alicubi  non  multus  erat  evangelii  profectus.  Omnes  quae  sua  erant,  quaerebant,  non  quae  Iesu  Christi.  Alii  retrorsum  abibant,  canes  ad  vomitum,  et  sues  ad  volutabrum  luti.  Plerique  libertatem  spiritus  rapiebant  ad  licentiam  carnis.  Insinuabant  sese  multi  fratres,  a  quibus  deinde  piis  imminebant  pericula.  Inter  ipsos  fratres  variae  concertationes  suscitabantur.  Quid  hic  apostolis  agendum  erat?  an  non  vel  ad  tempus  dissimulandum,  vel  potius  omittendum  illud  evangelium  ac  deserendum  erat,  quod  tot  litium  videbant  esse  seminarium,  tot  periculorum  materiam,  tot  scandalorum  occasionem?  At  in  huiusmodi  angustiis  succurrebat,  Christum  esse  lapidem  offensionis,  et  petram  scandali,  positum  in  ruinam  et  resurrectionem  multorum,  et  in  signum  cui  contradiceretur  (Luc.  2,  34).  Qua  fiducia  armati  per  omnia  tumultuum  offensionumque  discrimina  audacter  progrediebantur.  Eadem  et  nos  cogitatione  sustentari  decet,  quando  hunc  perpetuum  evangelii  genium  esse  testatur  Paulus  (2  Cor.  2,  16),  ut  sit  odor  mortis  in  mortem  iis  qui  pereunt;  tametsi  in  hunc  potius  usum  nobis  destinatum  erat,  ut  odor  esset  vitae  in  vitam,  ac  potentia  Dei  in  salutem  fidelium.