1:27  [CO  1.  27]  CHRISTIANAE  RELIGIONIS  INSTITUTIO,  IO.  CALVINO  AUTORE  DE  LEGE,  QUOD  DECALOGI  EXPLICATIONEM  CONTINET.  CAP.  I.  [OS  37][p.  42]  Summa  fere  sacrae  doctrinae  duabus  his  partibus  constat:  Cognitione  Dei  ac  nostri.  Haec  vero  de  Deo  nobis  in  praesentia  discenda  sunt.  Primum,  ut  certa  fide  constitutum  habeamus,  ipsum  infinitam  esse  sapientiam,  iustitiam,  bonitatem,  misericordiam,  veritatem,  virtutem  ac  vitam:  ut  nulla  sit  prorsus  alia  sapientia,  iustitia,  bonitas,  misericordia,  veritas,  virtus  et  vita  (Bar.  3.  Iac.  1).  Et  quidquid  earum  rerum [p. 43]  ubivis  spectatur,  ab  ipso  sit  (Prov.  16).  Deinde,  universa  quae  in  coelo  sunt  et  in  terra,  in  eius  gloriam  creata  esse  (Psal.  148.  Dan.  3).  Idque  iure  illi  deberi,  ut  singula  pro  naturae  suae  ratione  illi  serviant,  eius  imperium  intueantur,  maiestatem  eius  suspiciant,  et  parendo  velut  dominum  ac  regem  agnoscant  (Rom.  1).  Tertio  loco,  iustum  esse  ipsum  iudicem,  itaque  in  eos  severe  vindicaturum,  qui  ab  eius  praescriptis  deflexerint,  qui  non  per  omnia  eius  voluntati  obsequuti  fuerint:  qui  alia  cogitaverint,  dixerint,  ac  fecerint,  quam  quae  ad  eius  gloriam  pertinent  (Psal.  7.  Rom.  2).  Quarto,  misericordem  esse  ac  mansuetum,  et  qui  miseros  ac  pauperculos  benigne  sit  accepturus,  qui  ad  eius  clementiam  confugiant,  et  in  eius  fidem  se  conferant;  qui  parcere  ac  condonare  paratus  sit,  si  qui  veniam  ab  eo  postulent,  qui  velit  succurrere  ac  opem  ferre,  si  qui  eius  auxilium  implorent,  qui  servare  velit,  si  qui  fiduciam  omnem  in  eo  reponant  ac  defigant  (Psal.  103.  Ies.  55.  Psal.  25  et  85).  Quo  in  certam  nostri  notitiam  veniamus,  hoc  prius  [OS  38]  habendum  est:  parentem  omnium  nostrum  Adam  esse  creatum  ad  imaginem  et  similitudinem  Dei  (Gen.  1),  hoc  est,  sapientia,  iustitia,  sanctitate  praeditum,  atque  his  gratiae  donis  Deo  ita  haerentem,