6:268  Praedictum  est,  inquit,  fore  sectas  et  haereses:  fore  qui  profiteantur  ore  Christum,  et  magistri  erroris  sint,  lupi  rapaces,  obtecti  vellere  ovium,  qui  incautos  ab  ovili  Christi  abducant,  doceant  Christum  contra  Christum,  in  deserto,  in  angulis,  in  latibulis.  Subiungit,  quibus  armis  oppugnent  ecclesiam  haeretici  :  nempe,  quibus  Satan  dux  eorum  et  magister  Christum  aggressus  est,  hoc  est,  scripturis  perperam  in  suum  sensum  detortis.  Tertio  loco  ad  remedium  descendit:  si  fideles  scilicet  se  ab  ecclesiae  unitate  noii  patiantur  abduci.  Ego  vero  fateor,  huic  malo  semper  obnoxiam  fuisse  ecclesiam,  et  ad  finem  usque  mundi  fore,  ut  ab  hostibus  domesticis  graviter  laboret.  Quod  et  omnium  temporum  experimentis  plus  satis  comprobatum  antehac  fuit,  et  nunc  magno  nostro  malo,  et  non  sine  acerbissimo  dolore  experimur.  Quo  atrocior  est  pestis  ac  nocentior,  eo  magis  de  remedio  cogitandum  esse  bene  admonet  Pighius:  sed  quale  illud  sit,  quaerendum.  Miror  autem,  hominem  sic  praecipitem  ferri  suo  affectu,  ut  se  impingere  primo  gradu  ad  verum  remedium  non  sentiat.  Non  dubium,  inquit,  quin  sic  adoriantur  nunc  pios  haeretici,  qualiter  Satan  olim  Christum:  nempe  falsa  scripturarum  interpretatione.  Quis  non  continuo  nunc  inferat,  resistendum  igitur  exemplo  Christi?  Quid  enim?  An  impii  Satanae  magisterio  ad  impugnandam  fidem  instruentur,  Christus  ad  fidei  defensionem  suos  non  armabit?  Iam  vero  quo  clypeo,  quo  gladio,  et  quibus  armis  Satanam  tunc  repulerit,  notum  est.  Scriptum  est,  inquit.  Quum  sola  scriptura  fretus  profligato  subactoque  hoste  victor  evadat,  nonne  et  illuc  quasi  sublato  signo  nos  vocat,  et  certam  victoriam  pollicetur?  Quid  autem  Pighius  ex  adverso?  Haeretici  in  hoc  capitis  sui  Satanae  imitantur  astutiam,  quod  sub  falso  scripturae  praetextu  venenum  suum  propinant.  Caveant  [pag.  50]  sibi  fideles  ab  insidiis:  clypeum  et  arma  induant.  Nempe,  ut  simul  cum  Christo  confugiant  ad  scripturam?  Minime,  inquit  (nulla  enim  illic  securitas),  sed  ad  ecclesiae  traditionem,  tanquam  ad  unicum  asylum,  se  recipiant.  An  ad  tam  crassas  ineptias  delaberetur,  si  vel  unciam  sani  cerebri  haberet?  At  scripturae,  inquit,  pro  impiorum  libidine,  huc  illuc  trahuntur,  ut  sine  ecclesiae  definitione  nullus  certus  sensus  haberi  queat,  in  quo  acquiescamus.  Illud  est  scilicet  tritum  ac  vulgare  Lucianicorum  proverbium,  de  sacro  sancto  Dei  verbo,  nasum  esse  cereum,  in  formas  omnes  flexilem,  prout  hominibus  libuerit  hunc  aut  illum  sensum  affingere.  Itane  vero?  Ut  nulla  sit  tam  contempta  aut  abiecta  philosophorum  secta,  quae  non  autoris  sui  mentem  ex  eius  scriptis  certo  teneat:  soli  Christiani,  quum  de  magistri  sui  doctrina  quaeritur,  alio  circumspectent?  TJt  in  schola  Pythagorae  valeat  illud  avTOc  i'ya,  Christus  inter  suos  discipulos  tantum