55:268  adeptus  est  per  mortem,  quum  in  arca  non  secus  atque  in  sepulcro  inclusus  fuit,  et  toto  mundo  pereunte  servatus  fuit  cum  exigua  familia:  sic  hodie  mortificatio,  quae  in  baptismo  figuratur,  nobis  ingressus  est  in  vitam:  nec  salus  speranda  est,  nisi  a  mundo  simus  segregati.  Non  abiectio  sordium.  Hoc  ideo  additum  est,  quoniam  fieri  interdum  potest  ut  maior  pars  hominum  Christi  nomen  profiteatur:  ac  eodem  nobiscum  baptismo  initiati  sunt  fere  omnes  in  ecclesiae  societatem.  Hoc  modo  non  conveniret  quod  prius  dixit,  paucos  hodie  servari  per  baptismum:  sicuti  octo  solum  animas  Deus  per  arcam  liberavit.  Hanc  obiectionem  Petrus  occupat,  quum  testatur  se  non  loqui  de  nudo  signo,  sed  simul  coniungere  effectum.  Ao  si  diceret,  semper  futurum  quod  saeculo  Noe  contigit,  ut  humanum  genus  in  suum  exitium  ruat:  pusillum  vero  gregem  mirabiliter  eripiat  Dominus.  Videmus  nunc  quid  sibi  velit  haec  correctio.  Poterat  enim  quispiam  obiicere,  baptismo  Noe  nostrum  esse  longe  dissimilem,  quia  plerosque  hodie  baptizari  contingat.  Respondet  autem,  non  sufficere  externum  symbolum,  nisi  vere  et  efficaciter  baptismum  suscipiant.  Atqui  eius  veritas  in  paucis  reperietur.  Unde  sequitur  non  debere  nos  circumspicere  quid  agat  vulgus  hominum,  ut  ab  exemplis  pendeamus  nec  debere  nos  metuere,  si  pauci  simus  numero.  Caeterum  hoc  testimonium  perperam  detorquent  fanatici  homines  (ut  Schvincfeldius)  dum  sacramentis  omnem  vim  et  effectum  detrahere  volunt.  Neque  enim  hic  docere  voluit  Petrus  inane  et  inefficax  esse  Christi  institutum,  sed  tantum  excludere  hypocritas  a  spe  salutis,  qui  baptismum,  quantum  in  se  est,  depravant  ac  corrumpunt.  Porro  quum  de  sacramentis  agitur,  duo  sunt  consideranda,  signum  et  res.  Ut  in  baptismum  signum  est  aqua:  res  autem,  ablutio  animae  per  sanguinem  Christi,  et  carnis  mortificatio.  Horum  utrunque  sub  se  complectitur  Christi  institutum.  Quod  autem  saepe  inefficax  et  absque  fructu  signum  apparet,  id  fit  hominum  abusu,  qui  sacramenti  naturam  non  tollit.  Discamus  ergo  rem  signatam  a  signo  non  divellere.  Quamquam  simul  a  diverso  vitio  cavendum  est,  quale  inter  papistas  regnat.  Quia  enim  inter  rem  et  signum  non  distinguunt  ut  oportet,  consistunt  in  externo  elemento,  et  illic  locant  salutis  fiduciam.  Itaque  aquae  conspectus,  eorum  mentes  a  Christi  sanguine  et  gratia  spiritus  abstrahit.  Christum  non  cogitant  bonorum  omnium,  quae  illic  offeruntur,  unicum  esse  autorem,  gloriam  mortis  eius  ad  aquam  transferunt,  arcanam  spiritus  virtutem  alligant  visibili  signo.  Quid  ergo  agendum  est?  Ne  separemus  quae  a  Domino  coniuncta  sunt.  Debemus  in  baptismo  agnoscere  spirituale  lavacrum  debemus  illic  testimonium  remissionis  peccatorum,  et  renovationis  nostrae  pignus  amplecti: