51:268  demeurer  au  monde,  il  est  certain  que  iamais  nous  ne  viendrions  a  luy:  mais  tousiours  ne  ferions  que  augmenter  le  mal  et  nostre  condamnation.  Brief,  d'autant  que  les  hommes  vivent  plus  longuement  au  monde,  d'autant  se  plongent-ils  en  leur  condamnation  tant  plus  profond.  Et  ainsi  Dieu  ne  peut  pas  prevoir  ce  qui  n'est  pas  en  nous,  iusques  a  ce  qu'il  y  ait  mis.  Comment  donc  venons-nous  a  Dieu  ?  comment  luy  obeissons-nous  ?  comment  avons-nous  un  coeur  paisible,  qui  se  renge  selon  la  foy?  Tout  cela  procede  de  luy.  Ainsi  donc  il  faut  bien  qu'il  face  le  tout.  Et  pourtant  cognoissons  que  sainct  Paul,  en  disant  qu'il  nous  a  eleus  devant  la  creation  du  monde,  presuppose  ce  qui  est  vray,  que  Dieu  n'a  peu  regarder  en  nous  sinon  le  mal  qui  y  estoit:  car  du  bien,  il  n'y  en  pouvoit  pas  trouver  une  seule  goutte.  Ainsi,  puis  qu'il  nous  a  eleus,  voila  encores  un  tesmoignage  trop  manifeste  de  sa  bonte  gratuite.  Et  c'est  pourquoy  aussi  au  neufieme  chapitre  des  Romains,  parlant  de  Iacob  et  d'Esau,  du  temps  qu'ils  estoyent  encores  au  ventre  de  la  mere  tous  deux,  comme  ils  estoyent  enfans  gemeaux,  devant  qu'ils  fissent  ne  bien  ne  mal,  a  fin  que  le  tout  vint  du  coste  de  celuy  qui  les  appeloit,  et  non  pas  du  coste  de  leurs  oeuvres,  il  est  dit  que  le  plus  grand  servira  au  petit.  Nous  voyons  donc  comme  sainct  Paul  declare  la  plus  au  long  ce  qu'il  touche  ici  en  brief,  c'est  a  scavoir,  que  quand  Dieu  nous  a  eleus  devant  la  creation  du  monde,  en  cela  il  a  assez  monstre  que  l'un  n'est  pas  plus  digne  et  excellent  que  l'autre,  et  qu'il  n'y  a  aucun  regard  de  dignite.  Ce  n'est  donc  pas  du  coste  des  oeuvres,  puis  que  Iacob  et  Esau  n'avoyent  fait  encores  ne  bien  ne  mal:  mais  c'est  du  coste  de  l'appelant.  Il  nous  faut  donc  attribuer  toute  la  louange  a  Dieu,  et  que  rien  n'en  soit  ici  reserve  a  l'homme.  Voila  donc  derechef  encores  ce  que  nous  avons  a  observer,  quand  sainct  Paul  dit  ici  que  nous  avons  este  eleus  devant  la  creation  du  monde.  Il  conferme  encores  mieux  cela,  disant,  Que  c'a  este  en  Iesus  Christ.  Si  nous  avions  este  eleus  en  nous-mesmes,  encores  pourroit-on  dire  que  Dieu  auroit  trouve  quelque  vertu  secrete,  laquelle  estoit  incognue  des  hommes:  mais  quand  nous  sommes  eleus  hors  de  nous-mesmes,  c'est  a  dire,  que  Dieu  nous  aime  hors  de  nous-mesmes,  que  repliqueronsnous  la?  Si  ie  fay  du  bien  a  quelqu'un,  c'est  d'autant  que  ie  l'aime.  Si  on  cerche  la  cause  de  l'amour,  ce  sera  pource  que  ie  me  conforme  a  luy  en  moeurs,  ou  bien  que  i'auray  quelqu'autre  regard.  Mais  il  ne  faut  rien  imaginer  de  semblable  en  Dieu:  et  aussi  il  nous  est  ici  exprime:  car  sainct  Paul  dit  que  nous  avons  este  eleus  en  Iesus  Christ.  Quand  donc  Dieu  nous  a  voulu  aimer,  a-il  iette  l'oeil  sur  nous  ?  Nenni  :  car  nous  luy  eussions  este  detestables.