5:268  lier  cum  septem  suis  filiis.  Omnes  quum  pauxillum  suillae  carnis  gustando  vitam  redimere  possent,  extremos  subire  cruciatus  maluerunt,  quam  eius  saporem  linguae  admovere.  Quorum  omnium  si  factum  per  se  ipsum  spectes,  parum  aberit  quin  tibi  in  oppetenda  usque  eo  temere  morte,  insanisse  videantur:  sin  causam  diligenter  expendas,  gravissimam  fuisse  rationem  invenies,  cur  ad  saevissima  quaeque  perferenda  supplicia  darent  potius  sese,  quam  interdicti  cibi  gustu  contaminarent.  Fateor  in  suillae  esu  nihilo  fuisse  alioqui  plus  religionis,  quam  in  manducandis  panibus  propositionis  :  quibus  tamen  urgentem  famem  depellere  Davidi  nullo  piaculo  licuit  (1  Sam.  21,  7).  Verum  quum  impius  tyrannus,  qui  non  Dei  legem  modo  abolitam  sed  nomen  quoque  penitus  exstinctum  cupiebat,  illis  instaret,  ut  hoc  symbolo  ab  observatione  mosaicae  legis  deficere  se  testarentur,  reputabant  id  quod  res  erat,  non  in  una  duntaxat  caeremoniola,  si  obsequerentur,  violatum  iri  a  se  legem:  sed  editum  iri  testimonium,  quo  [pag.  34]  Deum  cum  universa  sua  lege  abnegarent.  Quo  factum  est,  ut  quum  sancto  illi  viro  ab  amicis  carnes  aliae  supponerentur,  quas  pro  suillis  ederet,  ne  ea  quidem  simulatione  elabi  sustinuerit,  quod  videbat  eandem  semper  Dei  adversariis  blasphemiae  tesseram  se  daturum.  Non  est,  aiebat,  aetati  nostrae  decorum,  fingere:  quo  multi  adolescentes  Eleazarum  nonagenarium,  ad  vitam  alienigenarum  transisse  arbitrati,  et  ipsi  propter  meam  simulationem,  et  propter  modicum  corruptibilis  vitae  tempus  decipiantur,  atque  ita  maculam  et  exsecrationem  meae  senectuti  acquiram.  Nam  etsi  in  praesenti  tempore  hominum  suppliciis  eripiar,  manum  tamen  omnipotentis  nec  vivus  nec  mortuus  effugiam.  Quapropter  vita  fortiter  excedendo,  agam  quod  aetate  mea  dignum  est:  adolescentibus  autem  exemplum  forte  relinquam,  si  prompto  animo  ac  constanter  pro  gravissimis  et  sanctissimis  legibus  honesta  morte  perfungar.  En  profecto,  non  dicam  appositissimum  exemplum,  sed  expressam  imaginem  quae  nobis  ad  vivum  referat,  quid  sit,  ad  placandos  evangelicae  veritatis  adversarios,  missam  audire.  Ad  haec,  utut  istud  vitii  in  minimis  malis  habeant:  si  tamen  et  vitium  esse,  et  divinae  voluntatis  transgressionem  fatentur,  quod  negari  non  potest,  non  adeo  nihilo  aestimare  debent,  ut  nobis  prope  permissum  faciant.  Quanquam  enim  si  inter  se  ipsa  conferantur  Dei  mandata,  alterum  altero  praeponderatur:  ubi  tamen  ab  illa  collatione  discessimus,  nihil  tanti  esse  nobis  debet,  quod  non  eorum  postremo  facile  cedat.  Sic  enim  ipse  quoque  magister  sua  voce  docet:  Qui  unum,  inquit  (Matth.  5,  19),  ex  minimis  istis  mandatis  solverit,  et  sic  docuerit  homines,  minimus  vocabitur  in  regno  Dei.  Videmus  hac  oratione  genus  illud  doctorum  directe  peti.  qui  sic  inter  Dei  leges  distinguunt,  quasdam  ut  leviores  esse  doceant,  quarum