41:268  quamvis  tunc  impietas  et  contemptus  Dei  pervagaretur  totum  orbem,  hoc  tamen  non  abs  re  de  Romanis  dici,  quoniam  tantum  ex  superbia  sua  iudicium  fecerunt,  an  colendus  esset  deus  hic  vel  ille.  Et  ideo  ponet  angelus  deum  Maozim,  hoc  est,  fortitudinum  vel  munitionum.  Locus  ille,  ut  cras  dicam,  male  expositus  fuit.  Neque  enim  coelum,  neque  terram  attingunt  interpretes,  ut  videbimus.  Sed  hic  angelus  quum  Romanis  tribuit  Dei  contemptum,  et  omnium  deorum,  significat  tam  superbos  fore,  ut  superent  quaslibet  profanas  gentes  sua  impietate.  Et  certum  est,  nullum  fuisse  Dei  timorem  etiam  superstitiosum  apud  illos,  et  quamvis  magnifice  praedicarent  suam  et  maiorum  pietatem,  tamen  si  quis  diligenter  expendat  eorum  scripta,  facile  deprehendet  intimos  sensus,  quod  scilicet  omnes  deos  habuerint  ludibrio,  et  abusi  fuerint  titulo  et  colore  pietatis  ad  fastum  suum:  deinde  ad  continendos  in  officio  omnes  subditos.  Non  abs  re  igitur  dicit  de  hoc  imperio  angelus,  magnificabit  se  supra  omnes  deos:  deinde,  loquetur  mirabilia  contra  Deum  deorum,  ex  quo  scilicet  innotuit  iudaica  religio.  Nam  antequam  transirent  in  Asiam  maiorem,  et  penetrarent  ultra  fines  Tauri  montis,  incognita  illis  erat  lex  Dei,  et  nomen  Mosis  nunquam  fuerat  auditum.  Inde  coeperunt  cognoscere  in  illa  gente  coli  aliquem  deum  peculiarem,  deinde  esse  formam  pietatis  ab  aliis  omnibus  populis  distinctam.  Ex  quo  igitur  propior  cognitio  iudaicae  religionis  apud  Romanos  lucere  vel  micare  coepit,  coeperunt  evomere  suas  blasphemias  in  Deum  deorum.  Neque  opus  est  colligere  quaecunque  exstant  in  ipsorum  historiis:  sed  Cicero  pro  Flacco*)  plus  quam  contumeliose  lacerat  nomen  veri  Dei:  et  impurus  ille  rabula  (nam  dignus  est  illo  nomine)  sic  deblaterat  sua  convicia,  ac  si  Deus,  qui  sese  patefecerat  electo  populo  per  legem  suam,  esset  indignus  qui  numeraretur  vel  cum  Venere,  vel  cum  Baccho,  vel  cum  aliis  idolis:  denique  dicit  invisam  esse  illam  religionem  omnibus  diis,  quoniam  Iudaei  tot  cladibus  affecti  fuerant,  et  hoc  signum  debere  sufficere,  ut  religio  illa  esset  detestabilis  omnibus.  Non  igitur  sine  causa  hic  angelus  inducit  Romanos  tanto  fastu  et  contumacia  inflatos,  ut  non  dubitent  convitiis  proscindere  veri  Dei  nomen.  Loquetur,  inquit,  mirabilia  contra  Deum  deorum.  Tanquam  de  uno  homine  hic  disserit  angelus:  sed  diximus  ad  ipsam  monarchiam  spectare.  Postea  adiungit,  Et  feliciter  aget  usque  ad  consumptionem  vel  complementum.  Alii  vertunt,  consummationem  irae,  quomam  determinatio  facta  est.  Hic  etiam  de  longo  successu,  et  continua  serie  victoriarum  disserit  angelus,  quod  in  Antiochum  non  posset  competere.  Nam  statim  exstinctus  fuit,  postquam  templum  spoliaverat:  deinde  *)  Cap.  28.