6:267  KESPONSIO  CONTRA  PIGHIUM  nostrae  vires  longo  intervallo  superare;  deinde,  neminem  unquam  exstitisse,  qui  iustitiae  legis  omni  ex  parte  satisfecerit;  neminem  fore,  ac  ne  exsistere  quidem  posse  talem.  Neque  tamen  interea  negamus,  quin  homini  possit  Deus  talem  gratiae  perfectionem  conferre,  quae  par  sit  futura  iustitiae  legis:  sed  quia  se  facturum  hoc  negavit,  simpliciter  impossibile  dicimus  fieri.  Ac  ne  videamur  loqui  sine  autore,  Paulum  in  hoc  sequimur,  qui  non  alia  ratione  probat  omnes  qui  sub  lege  sunt,  maledictioni  esse  obnoxios,  nisi  quia  maledicantur  omnes,  qui  non  permanserint  [pag.  48J  in  omnibus,  quae  scripta  sunt  (Gal.  3,  10).  Non  staret  autem  argumentum,  nisi  pro  confesso  assumeret,  neminem  implere  posse.  Demus  enim  unum  aliquem  posse:  qualis  erit  ratiocinatio?  Deus  maledicit  omnibus,  qui  legem  suam  non  implent.  Ergo  necesse  est  omnes  esse  maledictos,  qui  unquam  fuerunt,  sunt,  et  erunt.  Sed  Paulus  principium  habet,  scilicet  incognitum  Pighio:  necessarium  debere  censeri,  quod  scripturis  praedictum  est.  Quum  igitur  sanctos  omnes  reos  transgressionis  faciat  scriptura,  inde  colligere  non  dubitat,  neminem  esse  qui  reatu  eximere  se  possit.  Patres  vero,  legem  observatu  possibilem  quum  dicerent,  non  hoc  ad  liberi  arbitrii  facultatem,  sed  gratiae  potentiam  referebant.  Nam  et  Hieronymus  ipse,  quem  citat  Pighius,  sic  interpretatur.  Augustinus  l)  etiam  clarius  :  Non  utrum  praeceptum  sit  homini,  inquit,  ut  sine  peccato  sit,  quaeritur  (est  enim  manifestum),  sed  utrum  in  hoc  corpore  possit  impleri,  ubi  caro  concupiscit  adversus  spiritum.  Paulo  post  subiungit:  Non  ad  saturitatem  iustitiae,  quum  hinc  exierit,  quisquam  perveniet,  qui  non  esuriendo  et  sitiendo  cucurrerit.  Hic  loquitur  de  sanctis,  qui  spiritu  Dei  iam  in  obedientiam  legis  aguntur.  Ubi  vero  tractat  de  natura,  ne  inchoare  quidem  posse  legem  concedit:  sicut  alibi  videbimus.  Neque  enim  iustam  adhuc  de  iis  rebus  disputationem  ingredimur:  quo  fit  ut  leviter  tantum  eas  transcurram,  quo  citius  perveniam  ad  proprium  earum  locum.  Quanquam  minime  recipienda  est  haec  conditio,  ad  quam  Pighius  quum  ubique,  tum  hoc  praesertim  loco  nos  revocat:  ut  fidei  regulam,  non  ex  Dei  verbo,  sed  ecclesiae  traditione  petamus.  Absit  vero  ut  christiana  fides  tam  infirmo  et  caduco  fundamento  fulciatur.  Quid  enim  aliud  relinquitur  Deo  vivo,  quam  mortuis  idolis,  si  decretis  hominum  stare  vel  cadere  dicatur  aeterna  eius  veritas?  Et  quae  erit  fidei  stabilitas,  quam  adversus  omnes  inferorum  machinas  invictam  stare  oportet,  si  ab  hominum  [pag.  49]  nutu  arbitrioque  pendeat?  Sed  audiamus  bellas  hominis  rationes,  quibus  urgere  nos  conatur.  1)  In  Epist,  ad  Ctesiphontem,  De  perfect,  iustitiae.