6:266  diturum  me,  si  ea  assererent.  Dicet  quispiam,  quid  igitur  cum  tam  deplorato  homine  ludis  operam?  Ego  vero  ne  verbum  quidem  facerem  eius  causa.  Sed  operam  hanc  aliis  impendo,  qui  vel  ad  amplexandam  veritatem  sponte  propensi  sunt:  vel  sic  in  errore  detinentur,  ut  sint  tamen  sanabiles:  vel  saltem  non  ita  sunt  obstupefacti,  quin  sentiant  quod  dicitur.  At  sacris  Dei  oraculis  nihil  derogare  se  putat,  quia  possibile  non  sit"  ea  aut  Luthero,  aut  nobis  suffragari.  Ego  vero  nullum  praetextum  obtendi  posse  contendo,  quin  istae  voces  illustre  et  consignatum  ad  posteros  testimonium  reddant,  spiritui  sancto  in  scripturis  loquenti,  et  aeterna  Dei  placita  pronuncianti,  nihilo  plus  reverentiae  detulisse  Pighium,  quam  Platoni  ex  proprio  capite  philosophanti.  Quis  enim,  modo  scintillam  unam,  quamlibet  exiguam,  timoris  Dei  residuam  in  corde  habeat,  sic  loqui  ausit?  Angelum  quidem  e  coelo,  si  aliud  evangelium  attulerit,  pro  anathemate  haberi  iubet  Paulus  (Gal.  1,  8).  Nempe,  quum  angelos  quoque  subiici  et  obedire  verbo  Dei  oporteat,  merito  rediguntur  in  hunc  ordinem,  ut  si  aliter  faciant,  daemones  censeantur.  Quanquam  autem  accidere  id  non  potest,  tanti  est  tamen  evangelii  maiestas,  ut  ad  eam  vindicandam  angelorum  nomine  quodammodo  abuti  nefas  non  sit.  Ipsi  autem  Deo  anathema  irrogare,  quale  exemplum  est?  Deum  in  scripturis  sanctis  loqui,  nemo  piorum  dubitat.  Quid  ergo  aliud  sibi  voluit  illis  verbis  Pighius,  quam  certa  Dei  oracula  [pag.  47]  se  dicturum  a  diabolo  edita  fuisse,  si  liberum  homini  arbitrium  tollant?  Haec  quicunque  pius  audit,  nonne  Cerberum  potius  aliquem  latrare  dicat,  quam  hominem  loqui?  Iam  ut  scripturas  ipsas  nobis  excutiat,  hoc  argumento  utitur:  legisse  eas  patres  omnes,  orthodoxos  et  sanctos  homines,  neminem  tamen  eorum  intellexisse,  inevitabili  necessitate  nobis  provenire  omnia;  neminem  dixisse,  impossibilia  nobis  a  Deo  praecipi,  *aut  pro  iis  damnari  homines,  quae  non  libera  voluntate,  sed  fatali  necessitate  impulsi  faciunt;  neminem,  Deum  existimasse  fontem  ac  scaturiginem  scelerum  et  flagitiorum  omnium.  Primum  respondeo,  patres  nihilo  magis  quam  nos  vitam  resque  hominum  fortunae  subiicere,  sed  providentiam  Dei  agnoscere  et  constituere  summam  et  unicam  gubernatricem,  quae  praesit  consiliis  hominum,  voluntates  flectat,  eventus  moderetur;  nec  providentiam  eos  imaginari,  quae  subitos  aut  caecos  habeat  motus,  vel  ab  inferioribus  causis  pendeat,  vel  nutet  varia  et  incerta  ad  fortuitos  casus,  sed  quae  firmo,  stabili,  perpetuoque  tenore  sibi  constet.  De  possibili  aut  impossibili  legis  observatione,  non  est  quod  nos  in  certamen  cum  patribus  committat.  Nam  quum  observationem  legis  homini  asserimus  esse  impossibilem,  duo  comprehendimus:  perfectionem,  quae  illic  a  nobis  exigitur,  naturae