50:266  trarium  est  spirituali  Christi  regno,  mundus  est:  quia  ad  veterem  hominem  pertinet.  Vel,  ut  uno  verbo  dicam,  mundus  est  quasi  obiectum  et  scopus  veteris  hominis.  Eum  sibi  crucifixum  dicit  Paulus  :  quo  sensu  alibi  (Philip.  3,  8)  testatur,  omnia  se  reputasse  pro  stercoribus.  Crucifixio  enim  mundi  est  contemptus  et  abiectio.  Addit  vicissim  se  mundo  crucifixum:  quo  intelligit,  sibi  susque  deque  esse,  quod  nihili  fiat,  sitque  tanquam  in  nihilum  redactus:  quia  nihil  ad  mortuum  pertineat,  vel  certe  se  mortificatione  veteris  hominis  renuntiasse  mundo.  Nam  quod  quidam  exponunt:  si  mundus  me  anathema  et  catharma  reputat,  ego  vicissim  illum  damno  et  exsecrationi  habeo:  mihi  videtur  esse  paulo  remotius  a  mente  Pauli.  Iudicium  tamen  erit  penes  lectores.  15.  Nam  in  Christo  neque  circumcisio.  Ratio  est  cur  sit  mundo  crucifixus,  et  mundus  illi:  quia  in  Christo,  cui  insitus  est,  solum  valet  nova  creatura.  Alia  igitur  omnia  facessere,  imo  interire  oportet.  Intelligo,  quae  renovationem  spiritus  impediunt.  Hoc  est  quod  dicit  etiam  in  secunda  ad  Corinthios  (5,  17):  Si  quis  in  Christo,  nova  sit  creatura:  hoc  est,  si  quis  censeri  vult  in  Christi  regno,  ille  reformatus  sit  Dei  spiritu:  non  vivat  amplius  sibi  nec  mundo,  sed  sit  suscitatus  in  novam  vitam.  Cur  autem  inde  inferat,  neque  circumcisionem,  neque  praeputium,  ante  dictum  est:  quia  scilicet  veritas  evangelii  omnes  legis  figuras  absorbeat  et  exinaniat.  16.  Quicunque  hac  regula.  Quicunque  tenent  hanc  regulam,  inquit,  bene  illis  sit  ac  feliciter.  Fausta  haec  precatio  approbationis  quoque  signum  est.  Significat  igitur  amandos  esse  et  omni  favore  prosequendos,  qui  talem  doctrinam  afferunt:  contra  vero,  qui  ab  ea  discedunt,  indignos  esse  qui  audiantur.  Nomen  regulae  posuit  ad  exprimendum  certum  et  perpetuum  tenorem,  cui  insistere  debent  omnes  pii  evangelii  ministri.  Quemadmodum  enim  architecti  quae  exstruunt  aedificia  ad  normam  exigunt,  ut  singulae  partes  iusta  proportione  inter  se  ac  symmetria  cohaereant  :  ita  canonem  assignat  verbi  ministris,  quo  rite  et  ordine  ecclesiam  aedificent.  Hic  locus  miram  alacritatem  addere  debet  tam  fidis  et  sinceris  doctoribus,  quam  universis  qui  ad  illorum  regulam  formari  se  patiuntur,  quod  audiunt  se  per  os  Pauli  a  Deo  benedici.  Non  est  quod  papae  fulmina  tam  timeamus,  si  pacem  et  misericordiam  Deus  e  coelo  nobis  promittit.  Verbum  ambulare  tam  ministro  quam  populo  commune  esse  potest:  tametsi  praecipue  in  ministros  competit.  Futurum  verbi  tempus  ad  notandam  perseverantiam  positum  est.  Super  Israelem  Dei.  Irridet  oblique  vanam  pseudoapostolorum  iactantiam,  qui  de  carnali  Abrahae  progenie  superbiebant.  Duplicem  itaque  facit