5:266  dubiam  nemini  futurum  erat,  tacuit:  diligenter  hoc  cavisse  ac  praestitisse,  ut,  quod  christiani  hominis  erat,  ab  omni  idololatriae  specie  quam  longissime  abesset.  Quanquam  autem  (quae  tua  est  erga  Dei  veritatem  observantia)  sententiam,  quam  tot  divinis  testimoniis  obsignatam  videas,  tibi  iam  plane  probatam  esse  confido:  quando  tamen  non  tibi  haec  uni  scribuntur,  aliorum  ut  me  rationem  simul  habere  patiaris,  abs  te  peto.  Quos  ad  concedendum  veritati  aliquanto  esse  in  hac  causa  difficiliores  quam  oporteat,  minus  idcirco  miror,  quod  insuave  illis  ingratumque  esse  non  dubito,  ab  ea,  cui  diu  placideque  indormierint,  indulgentia  excitari.  Ac  mihi  sane  videre  iam  quosdam  videor,  frivolam  intempestivamque  hanc  meam  morositatem  irridentes,  qui  rem  non  ita  magni  ponderis  perinde  urgeam,  ac  si  in  eo  cardine  tota  religionis  summa  verteretur.  Nam  et  ipse  quosdam  memini,  quibuscum  de  hac  re  mihi  olim  sermo  fuit,  quum  pressius  me  insistere  viderent,  quam  ut  suam  causam  recta  ratione  tueri  possent,  ad  hunc  confugere  locum  solitos.  Ut  nunc  temporum  foret  ratio:  nondum  a  rescindendis  gravioribus  vereque  seriis  malis  tantum  esse  otii  nobis,  ut  de  frivolis  istis  delictis,  et  velut  minutis  naeniis  valde  sollicitos  esse  oporteret.  Primum  hanc  decere  esse  curam,  ut  vera  in  hominum  animis  inseratur  ac  coalescat  pietas,  ut  mores  ad  pietatis  regulam  [pag.  32]  exigantur  ac  formentur:  ut  denique  tota  caritate,  mansuetudine,  patientia,  caeterisque  spiritus  donis  vita  intingatur.  Id  ubi  consequuti  fuerimus,  tum  fore  idoneum  tempus  ad  haec  leviora  descendendi.  Tanta  contra  perversitate  esse  hodie  quosdam,  ut  quum  una  missarum  ac  caeremoniarum  abominatione  totam  religionis  nostrae  vim  describant,  quidvis  in  homine  christiano  ferant  potius,  quam  missam  unam  auditam:  eum  vero  qui  a  missa  strenue  abhorruerit,  etiam  si  nulla  in  reliquis  vitae  partibus  mica  pietatis  eluceat,  solum  Christiani  nomine  dignum  et  agnoscant,  et  praedicent.  Talibus  obiectis  quid  tum  responderim,  testes  illi  mihi  sunt,  quos  dico.  Verum  quoniam  nonnullos,  ut  dixi,  fore  prospicio,  qui  nunc  quoque  non  dissimiliter  nos  accipiant,  hac  sua  ratiocinatione  parum  se  proficere,  ut  intelligant,  facturum  me  spero.  Eos  igitur  omnes  hortor,  primum,  ut  omni  contentione  posita,  secum  dispiciant,  num  pro  facili  levique  delicto  sit  ducendum,  quo  Paulus  (1  Cor.  10,  20  ss.)  Dominum  ad  pugnam  provocari,  quo  adversus  Christum  peccari,  quo  mensae  daemoniorum  communicari,  quo  Christi  mensam  repudiari  tradit.  Si  leves  illi,  facilique  digni  venia  lapsus  :  flagitiis  ac  sceleribus  definiendis,  quae  digna  tandem  verborum  gravitas  reperietur?  Huc  si  oblique  illas  Pauli  obiurgationes  detorqueri  aiunt,  quo  igitur  dirigi  possunt,  non  video.  Acerbum  illum  stilum  in  eos  stringebat,  qui  ad  edendas