47:266  mundo  nimium  addicti  sumus.  In  Christo  nihil  tale:  nulla  enim  eius  passio  ultra  suum  modum  unquam  erupit,  nulla  nisi  iusta  et  ex  ratione  Rectoque  iudicio  suscepta.  Ut  hoc  clarius  pateat,  inter  primam  hominis  naturam,  qualis  a  Deo  condita  fuit,  et  hanc  degenerem,  quae  per  peccatum  corrupta  est,  operae  pretium  est  distinguere.  Deus  quum  hominem  crearet,  affectus  illi  indidit,  sed  morigeros  et  rationi  obsequentes:  quod  autem  nunc  sunt  incompositi  et  rebelles,  accidentale  est  vitium.  Iam  Christus  humanos  affectus  suscepit,  sed  citra  axa^iav:  quia  fit  ut,  qui  passionibus  carnis  obsequitur,  Deo  non  obtemperet.  Turbavit  quidem  se  ipsum  Christus  et  vehementer  commotus  fuit,  sed  ita  ut  se  continuerit  sub  patris  voluntate.  In  summa,  si  passiones  eius  cum  nostris  conferas,  non  minus  inter  se  distabunt  quam  aqua  pura  et  illimis  tranquilloque  tractu  fluens  a  turbidis  lutosisque  spumis  differt.  Porro  ad  ferream  Stoicorum  duritiem  respuendam  unum  Christi  exemplum  sufficere  nobis  debet,  unde  enim  nisi  ab  ipso  petenda  nobis  est  summae  perfectionis  regula?  Quin  potius  studendum  est,  ut  correcta  domitaque  contumacia,  qua  propter  Adae  peccatum  impliciti  sunt  nostri  affectus,  Christum  sequamur  ducem,  qui  nos  in  ordinem  redigat.  Sic  Paulus  (1.  Thess.  4,  13)  non  saxeum  a  nobis  stuporem  requirit,  sed  temperari  luctum  iubet,  ne  tristitiae  nos  dedamus  sicut  increduli  qui  spem  non  habent,  nam  et  ideo  in  se  recepit  Christus  nostros  affectus,  ut  eius  virtute  subigere  possimus  quidquid  .in  illis  vitiosum  *est.  36.  Ecce  quomodo  amabat.  Duplex  hic  de  Christo  iudicium  nobis  describit  Ioannes.  Nam  priores  isti  qui  dicebant:  Ecce  quomodo  amabat  eum,  quamvis  minus  honorifice  de  Christo  sentiant  quam  par  erat,  utpote  nihil  illi  tribuentes  nisi  humanum,  aequius  tamen  et  modestius  de  ipso  loquuntur  quam  alii  qui  maligne  illi  obtrectant,  quod  Lazarum  a  morte  non  eripuerit.  Etsi  enim  virtutem  Christi  commendant,  de  qua  tacebant  alii,  hoc  tamen  non  faciunt  sine  exprobratione  quadam.  Satis  inde  patet,  non  incognita  illis  fuisse  quae  Christus  miracula  iam  ediderat,  sed  eo  foedior  est  ingratitudo,  quod  obstrepere  non  dubitant,  quia  nunc  in  una  parte  cessaverit.  In  eundem  modum  semper  ingrati  Deo  fuerunt  homines  atque  esse  pergunt:  nisi  votis  nostris  omnibus  satisfaciat,  statim  ad  querimonias  prosilimus,  quum  hactenus  iuvare  solitus  sit,  cur  nunc  me  destituit  ac  frustratur?  Duplex  autem  morbus  hic  grassatur,  quia  temere  optamus  quod  non  expedit,  Deum  tamen  volumus  perversis  carnis  nostrae  votis  subiicere:  deinde  quia  importuni  sumus  flagitatores,  et  impatientiae  fervore  ante  tempus  ruimus.  38.  Iesus  ergo  fremens.  Quia  non  accedit  Christus  ad  sepulcrum  tanquam  otiosus  spectator,  sed