41:265  265  IN  DANIELEM.  CAP.  XI.  266  hoc  postremo  membro  significat  sic  temporarias  fore  persequutiones,  de  quibus  loquutus  est,  ut  non  statim,  vel  post  annum  unum  vel  duos  cessent.  Adhuc  ergo  usque  ad  praefixum  tempus^  hoc  est,  comparent  se  filii  Dei  ad  nova  proelia,  neque  promittant  sibi  post  finem  anni  metam.  Sed  si  Deus  tribus  et  decem  et  centum  annis  velit  ipsos  humiliare,  ne  tamen  animos  despondeant,  sed  exspectent  tempus  illis  praefixum  divinitus,  neque  praefigant  suo  arbitrio.  Haec  summa  est.  Nunc  sequitur,  36.  Et  faciet  secundum  voluntatem  suam  (vel  libidinem)  rex:  et  extollet  se,  et  magnificabit  se  supra  omnem  Deum,  et  contra  Deum  deorum  loquetur  mirabilia,  et  prospere  aget  usque  ad  consummationem  irae7  quoniam  decisio  facta  est  (vel  decisa  est,  nempe  consumptio).  Locus  hic  valde  est  obscurus,  ideo  etiam  distrahitur  ab  interpretibus  in  contrarias  sententias.  Nam  fere  quod  obscurum  est  etiam  est  ambiguum.  Si  referre  velim  omnium  opiniones,  nullus  erit  finis:  deinde  non  magna  erit  utilitas.  Ego  igitur  sequar  aliam  rationem,  hoc  est,  omisso  illo  supervacuo  labore,  tantum  quaeram  quid  voluerit  angelus.  Tamen  cogar  breviter  referre  sententias,  quae  maiori  consensu  receptae  sic  occupant  fere  omnium  animos,  ut  possint  claudere  ianuam  verae  interpretationi.  Iudaei  adeo  inter  se  non  consentiunt,  ut  dissidium  quod  est  inter  ipsos  possit  generare  nobis  et  inducere  tenebras  potius  quam  adferre  quidquam  lucis.  Nam  alii  de  Antiocho  exponunt,  alii  autem  de  Romanis,  sed  alio  modo  quam  postea  dicam.  Quantum  ad  Christianos  spectat,  etiam  magnopere  inter  se  variant.  Sed  maior  pars  huc  inclinat,  vaticinium  hoc  debere  exponi  de  Antichristo.  Alii  sibi  melius  temperant,  dum  Antichristum  quidem  hic  oblique  notari  tradunt,  sed  tamen  non  debere  excludi  Antiochum,  qui  typus  et  imago  fuit  Antichristi.  Haec  postrema  sententia  aliquid  habet  verisimilitudinis,  tamen  nullo  modo  mihi  probatur,  et  facile  est  eam  refellere.  Antiochus  enim  non  supervixit  diu  ex  quo  templum  polluerat,  deinde  quae  postea  sequentur  nullo  modo  quadrant  eius  personae.  Quantum  ad  filios  eius  spectat,  non  possunt  etiam  hic  substitui  in  eius  locum.  Denique  necesse  est  transitum  facere  ad  alium  regem,  quam  fuerit  Antiochus,  vel  etiam  eius  haeredes.  Quemadmodum  iam  dixi,  quidam  ex  Rabbinis  volunt  intelligi  Romanos,  sed  carent  prorsus  iudicio.  Trahunt  enim  haec  verba  ad  Vespasianum  et  Titum  filium  eius,  et  postea  extendunt  ad  hoc  usque  saeculum,  quod  prorsus  ratione  caret,  itaque  garriunt  duntaxat  futiliter  suo  more.  Qui  autem  de  Antichristo  exponunt,  habent  vel  obtendunt  aliquid  coloris,  sed  nihil  in  eorum  doctrina  est  firmum  :  et  hoc  toto  orationis  progressu