6:264  stantia  et  creatione  malum  fingebant.  Nos,  ut  de  excellentissimo  Dei  opere  loqui  par  est,  creatum  fuisse  dicimus  rectum,  naturae  bonae  et  purae:  sua  autem  culpa  fuisse  vitiatum,  quum  sponte  a  Deo  defecit.  Quid  simile,  obsecro,  inter  substantiam  et  accidens?  inter  Dei  creationem,  et  accersitum  ab  homine  vitium?  Augustinus,  quum  de  Priscillianistis  agit,  in  eo  errare  dicit,  quod  non  arbitrio,  sed  ipsa  Dei  creatione  hominem  malum  asserunt.  Illos  damnando  non  modo  nos  absolvit,  sed  doctrinam  nostram  suo  suffragio  prorsus  comprobat.  Imo  quum  similem  huic  nostrae,  in  qua  nunc  versamur,  causam  agit  adversus  Pelagianos,  hoc  est  quum  ab  eadem  se  calumnia  purgat,  ita  pro  se  loquitur,  ut  nos  quoque  suo  patrocinio  sufficienter  defendat.  Atque  id  quidem  et  pluribus  facit  locis,  et  nunc  brevius,  nunc  fusius.  Quod  tamen  ad  nostram  quaestionem,  summa  huc  respicit,  eos  qui  sanandam  dicunt  naturam,  multum  a  Manichaeis  differre:  quia  sanari  non  posset,  si  aeternum  et  incommutabile  [pag.  44]  malum  esset  quod  somniat  Manichaeus.  Multum  esse  Manichaeis  contrarios,  qui  malum  naturae  nostrae  accidens  esse  dicunt,  quod  illi  referunt  ad  substantiam.  Eos  qui  arbitrium  non  nisi  ad  malum  esse  liberum  tradunt,  exortum  tamen  interea  ab  eo  quod  non  erat  malum  fatentur,  minime  ad  Manichaeos  accedere,  sed  eorum  errorem  fortiter  redarguere.  Quid  autem  istorum  non  semper  docuimus?  Si  hodie  viveret  Augustinus,  causaeque  nostrae  defensionem  ex  professo  susciperet,  non  posset  clarius  exprimere,  quod  ad  refutandam  huius  conviciatoris  calumniam  sufficiat.  Sed  videte  hominis  pudorem.  Parum  esse  putat,  si  nos  illorum  discipulos  faciat:  addit  enim  absurdiora  et  magis  impia  docere.  Manichaei,  inquit,  ne  malitiam  Deo  adscriberent,  duo  principia  finxerunt.  Lutherus  uni  Deo  optimo  maximo  scelera  et  flagitia  adscribit:  quia  in  illis  veluti  serrae  simus,  tracti  atque  acti  illius  impetu  quo  voluerit.  Manichaeus,  post  superiores  illos  haereticos,  duas  in  homine  naturas  facit:  alteram  bonam,  malam  alteram:  quarum  illa  peccare  non  possit,  neque  haec  bene  agere.  Lutherus  liberum  hominis  arbitrium,  imo  universam  hominis  naturam  asserit  necessario  et  semper  etiam  in  sanctis  spiritui  Dei  reluctari,  et  velut  feram  indomitam  nunquam  non  repugnare  Dei  gratiae.  Impios  veluti  serras  esse  in  manu  Dei,  quae  moveat,  vertat,  dirigat  eos  quorsum  vult,  non  ex  Luthero  est,  sed  ex  spiritu  sancto:  si  tamen  eum  per  prophetas  loquutum  fuisse  confitetur  Pighius.  Dicit  enim  Isaias  de  Sennacherib:  Numquid  gloriabitur  serra  adversus  eum  a  quo  trahitur  (Ies.  10,  15)?  Semper  tamen  expositionem  hanc  Lutherus  addidit:  sic  Dei  instrumenta  esse  omnes  impios,  ut  malitia  ab  ipsis  sit,  in  ipsis  resideat,  ipsis  quoque  sit  imputanda.  Eursum  universam  hominis  natu-