50:264  tiores  illos  ad  lectionem  reddat.  Nam  quo  plus  susceperat  laboris  eorum  causa,  eo  debebant  magis  accendi  ad  legendum,  non  perfunctorie,  sed  exactissimo  studio.  12.  Quicunque  volunt  placere.  Primum,  placere  in  carne  velle  est  ambitiose  aucupari  hominum  gratiam,  non  aedificationis  causa.  Et  verbum  compositum  usurpat,  quod  significat  blandi  vultus  ac  sermonis  illecebris  esse  gratiosum.  Accusat  ergo  ambitionis  pseudoapostolos,  ac  si  diceret:  Vultisne  scire  quales  sint,  qui  necessitatem  circumcisionis  vobis  imponunt?  quid  spectent,  quid  venentur?  Erratis,  si  putatis  ipsos  pio  aliquo  zelo  impelli:  sed  hominum  favorem  acquirere  vel  fovere  volunt  hac  mercede.  Nam  quum  Iudaei  essent,  volebant  gentis  suae  gratiam  hoc  modo  retinere,  vel  saltem  deflectere  odia.  Ita  solent  fere  ambitiosi  serviliter  iis  blandiendo,  per  quorum  gratiam  emergere  se  posse  sperant:  insinuant  se  in  illorum  animos,  ut  deiectis  melioribus  soli  regnent.  Hoc  pravum  consilium  detegit  Galatis,  ut  sibi  caveant.  Tantum  utne  persequutionem.  Crucem  Christi  rursum  vocat  puram  evangelii  praedicationem.  Sed  alludit  ad  eorum  delitias,  quod  Christum  docere  vellent  absque  cruce.  Haec  enim  causa  erat  cur  tam  infesta  rabie  ferrentur  Iudaei  adversus  Paulum,  quod  ferre  non  poterant  defectionem  a  caeremoniis.  Isti  ergo  ut  persequutionem  fugerent,  adulabantur  Iudaeis.  Quod  si  legem  servassent  ipsi,  fuisset  tolerabilius:  sed  totam  ecclesiam  privatae  suae  tranquillitatis  causa,  turbabant:  tyrannicum  iugum  imponere  conscientiis  non  dubitabant,  ut  a  corporali  molestia  immunes  essent  ac  liberi.  Ergo  crucis  metu  veram  praedicationem  crucis  adulterabant.  13.  Neque  enim  circumcisionem  habentes.  Vetus  interpres  et  Erasmus  habent  qui  circumciduntur.  Sed  quia  de  solis  doctoribus  Paulum  loqui  existimo,  non  generaliter  de  omnibus:  vitandae  ambiguitatis  causa  ita  reddere  malui.  Sensus  est  igitur:  non  faciunt  hoc  zelo  legis,  quod  vos  obstringunt  caeremoniarum  iugo.  Nam  cum  sua  circumcisione  legem  non  servant.  Praetextu  quidem  legis  exigunt  ut  circumcidamini:  sed  quum  circumcisi  sint  ipsi,  non  praestant  quod  iniungunt  aliis.  Caeterum  dubium  est,  quum  negat  eos  legem  s  e  r  v  a  r  e  ,  de  tota  lege  intelligat  an  de  caeremoniis.  Sunt  enim  qui  ita  exponant,  ne  illos  quidem  legi  satisfacere,  quia  sit  onus  importabile.  Sed  potius  eos  malae  fidei  insimulat,  quia  secure  legem  contemnerent,  quoties  abesset  invidia:  quae  pestis  nunc  quoque  passim  grassatur.  Nam  hodie  plures  reperias,  qui  papatus  tyrannidem  ambitione  quam  conscientia  defendant.  Loquor  de  aulicis  apostolis  et  quicunque  nidorem  culinarum  sequuntur.  Tanquam  ex  tripode  pronuntiabunt,  sanctae  romanae  ecclesiae  reverenter  observanda  esse  statuta.  Quid  ipsi  interim?  nihilo  pluris