15:264  Caeterum  hoc  tempore  de  impetranda  fratribus  illinc  aliqua  levatione  frustra  cogitaremus:  nisi  forte  novi  quidpiam  acciderit:  quod  nondum  despero  :  itaque  imminere  occasioni  statui.  Sed  adduci  nequeo,  ut  satagam  ante  tempus.  Ecce  etiam  de  eo  qui  Gratianopoli4)  tenebatur,  tristem  nuntium  a  fratre  tuo  Claudio  audies:  cuius  literas  ad  te  mitto.  Quod  me  tantopere  hortaris,  ut  istuc  cum  Vireto  quam  primum  veniam:  ego  vero  tibi  non  concedam,  hoc  tibi  magis  esse  in  votis  quam  mihi.  Sed  una  est  suscipiendae  profectionis  ratio,  si  Viretum  Bernam  usque  comiter  :  quod  facere  tentabo.  Sin  vero  haec  spes  me  et  illum  frustrabitur:  dimidium  saltem  eius  quod  optas  assequeris.  Imo  plus  dimidio.  Nam  me  aliqua  ex  parte  secum  feret.  Consilium  interea  fratribus  non  possum  aliud  dare,  nisi  ut  collegam  tuum  5)  coram  magistratu  admoneant,  ut  se  patiatur  in  ordinem  redigi.  Quod  si  pervicaciter  recusare  institerit,  denuntient  sibi  non  esse  loco  fratris,  qui  communem  disciplinam  contumacia  sua  perturbet:  semper  hoc  in  ecclesia  valuit,  quod  veteribus  synodis  fuit  decretum,  ut  qui  subiici  communis  disciplinae  legibus  noluerit,  munere  abdicetur.  Neque  hic  quaerenda  est  hominum  autoritas:  quum  spiritus  sanctus  de  talibus  pronunciaverit,  ecclesiam  non  habere  morem  contendendi.  Valere  ergo  ipsum  iubeant,  qui  communis  societatis  iura  respuit.  Non  puto  eo  usque  Satanam  istic  aut  alibi  usquam  valiturum,  ut  tantae  unius  hominis  proterviae  indulgeatur  contempto  fratrum  omnium  iudicio:  quod  importunitate  sua  vobis  ipse  tandem  extorserit.  Caeterum  eventum  gubernabit  Deus.  Utcunque  cadat,  vestrarum  tamen  partium  omnino  est,  graviter  hanc  minime  tolerabilem  insolentiam  severis  remediis  cohibere.  Proderit  tamen  simul  commemorare,  quam  improbe  hactenus  patientia  lenitateque  vestra  abusus  fuerit:  ne  ad  contentionem  subito  prosiliisse  videamini.  Vale,  frater  integerrime  et  amice  optime.  Fratres  omnes  cum  tua  familia  peramanter  salutabis  nomine  meo.  Dominus  vos  omnes  conservet.6)  4)  Fortassis  est  Botomagensis  Bie.  Le  Fevre  qui  Gratianopoli  captus  iam  Non.  Iul.  Lugduni  periit  De  alio  hoc  anno  martyre  Gratianopolitano  historia  tacet.  5)  Arcuarium,  nisi  fallimur,  de  quo  Viretus  N.  2024.  6)  Hanc  primis  Octobris  diebus  huius  anni  tribuendam  esse  putamus,  ex  ep.  Vireti  argumento  sumpto,  quanquam  non  omnino  certo.  Ibi  enim  de  consilio  Calvini  Bernam  proficiscendi  nihil.