49:263  263  EPIST.  PAULI  AD  ROMANOS  264  vero  iudicat  legem,  non  legis  est  observator,  sed  praeses.  Contra  vero,  inquit,  unus  est  legislator,  qui  potest  servare  et  perdere.  Tribunal  pro  iudicandi  facultate  Christo  attribuit,  qualiter  vox  archangeli,  qua  citabimur,  tuba  nominatur  alibi  (1.  Thess.  4,  16):  quia  suo  velut  clangore  omnium  mentes  auresque  percellet.  l  l  .  Scriptum  est  enim:  Vivo  ego.  Hoc  prophetae  testimonium  non  tam  ad  probationem  sententiae  illius  de  iudicio  Christi,  quae  indubitata  erat  apud  omnes  Christianos,  citasse  mihi  videtur,  quam  ut  ostenderet  iudicium  illud  summa  cum  humilitate  et  submissione  omnibus  esse  exspectandum:  quod  verba  quoque  sonant.  Prius  ergo  suis  verbis  testatus  est,  penes  Christum  unum  esse  iudicium  in  omnes  homines:  nunc  prophetae  verbis  demonstrat,  oportere  illius  iudicii  exspectatione  omnem  carnem  humiliari:  quod  per  genuflexionem  notatur.  Caeterum  quamquam  in  illo  prophetae  loco  Dominus  in  genere  praedicit  fore  ut  illustretur  gloria  sua  apud  omnes  gentes,  ac  maiestas  sua  ubique  emineat,  quae  tunc  inter  paucissimos,  velut  in  obscuro  aliquo  mundi  angulo,  delitescebat:  tamen  si  propius  expendimus,  palam  est,  eius  rei  complementum  non  exstare  nunc,  neque  unquam  exstitisse  in  hoc  mundo  :  neque  vero  eius  rei  in  posterum  spes  est.  Non  aliter  nunc  regnat  in  mundo  Deus  quam  per  evangelium:  nec  aliter  rite  honoratur  eius  maiestas  quam  ubi  ex  verbo  agnita  suspicitur.  Atqui  semper  habuit  Dei  verbum  hostes  suos,  qui  pervicaciter  restiterunt:  et  contemptores,  qui  ludibrio  illud  velut  rem  ludicram  ac  fabulosam  habuerunt.  Hodie  quoque  multi  tales  sunt,  et  perpetuo  erunt.  Hinc  apparet  inchoari  quidem  in  praesenti  vita  vaticinium  istud  :  sed  a  sua  perfectione  abesse,  donec  dies  ille  ultimae  resurrectionis  illuxerit,  quo  prosternentur  omnes  Christi  hostes,  ut  fiant  scabellum  pedum  eius.  Porro  id  quoque  fieri  non  poterit,  nisi  in  iudicium  sederit  Dominus:  ergo  bene  accommodavit  testimonium  hoc  ad  tribunal  Christi.  Est  etiam  insignis  locus  ad  stabiliendam  fidem  nostram  de  aeterna  Christi  divinitate.  Deus  enim  est  qui  illic  loquitur,  et  Deus  ille,  qui  gloriam  suam  alteri  non  cessurum  semel  pronuntiavit.  Iam  si  in  Christo  adimpletur  quod  uni  sibi  illic  vindicat,  ipse  procul  dubio  se  in  Christo  manifestat.  Et  sane  illius  prophetiae  veritas  tunc  palam  apparuit,  quum  ex  orbe  universo  populum  sibi  collegit  Christus,  atque  in  numinis  sui  cultum  evangeliique  obedientiam  redegit.  Quo  respexit  Paulus  Philip.  2,  9,  quum  diceret,  Deum  Christo  suo  nomen  dedisse,  in  quo  flectatur  omne  genu.  Ad  plenum  autem  constabit,  ubi  ad  iudicandos  vivos  et  mortuos  tribunal  conscenderit:  quemadmodum  illi  a  patre  datum  est  omne  iudicium  in  coelo  et  in  terra.  In  verbis  prophetae  est:  omnis  lingua  iurabit  mihi:  sed  quum  species  divini  cultus  sit  iusiurandum,