5:262  partae,  memoriam  subiiciat?  quod  unicum  sacerdotem  esse  Christum,  nullo  consorte,  nullo  successore,  doceat  atque  ostendat?  quod  eius  morte  perfecta,  quae  in  salutem  nostram  erant  omnia,  testetur?  Et  quo  igitur  iure  missa  eius  mnemosynon  censeatur,  cuius  nec  apiculum  proferat?  Porro  quod  sese  aiunt  eundem  fere  inde  usum,  quem  e  coena  capere:  amplissimum  ipsi  de  se  testimonium  ferunt,  nihil  se  illic  meditari  minus,  quam  ut  gloriae  confessionem  Christo  Domino  tribuant,  ad  quam  praescriptis  verbis  in  coena  vocantur  fideles.  Eius  autem  discriminis,  cuius  specie  praesentis  idololatriae  rationem,  a  veteris  illius  causa  disiungere  vulgo  conantur,  quanquam  exemptam  iam  plane  bonis  viris  omnem  dubitationem  arbitror,  quale  id  tamen  sit,  quando  ita  nos  facturos  recepimus,  et  quorundam  forte  frangendae  obstinationi  expedit,  consideremus.  Cur  tot  exsecrationibus  sancitum  sit  olim  a  Domino,  ne  gentium  superstitionibus  servi  sui  ullo  se  modo  commiscerent,  causam  fuisse  aiunt,  quod  ille  idolis  habitus  honor  quum  falsis  diis  manifeste  tribueretur,  divinitatis  quoque  honorem  a  vero  Deo  ad  illos  transferebat:  mundum  quidem  non  minus  abominanda  hodieque  superstitione  insanire,  caeremoniis  ineptire  aeque  prope  stolidis  et  fatuis:  verum  hoc  interesse,  quod  quales  tandemcunque  caeremoniae  istae  sint,  quia  tamen  Dei  nomen  prae  se  ferunt,  eiusque  sunt  cultui  destinatae,  eas  si  quis  perversa  superstitione  vacuus  solutusque  usurpet,  nihil  de  vera  Dei  religione  sit  derogaturus.  Haec  si  de  mediis  ritibus,  quos  docendi  causa  indifferentes  nuper  vocavimus,  disputarent,  eorum  permissioni  non  vehementer  reclamarem.  At  quum  eas  quoque  caeremonias  complectantur,  quae  manifesta  sunt  impietate  ac  non  ferendo  Dei  opprobrio  insignes,  quam  inscite  ratiocinentur,  paucis  e  scriptura  petitis  exemplis  ostendemus.  Serpentem  illum  aeneum  (Num.  21,  8  ss.),  qui  postquam  usum  praestare  desiisset  cuius  causa  fuerat  excitatus,  posteris  etiam,  quo  aeternum  esset  [pag.  28]  saeculis  omnibus  divini  beneficii  monumentum,  relictus  fuerat:  quum  praepostera  patrum  imitatione  a  filiis  postea  coli  coeptus  esset,  eundem  semper  optimae  religionis  praetextum  retinuisse  quis  dubitet?  passimque  et  vulgatum  fuisse,  et  obtinuisse,  illam  summi  Dei  esse  imaginem,  quae  in  eius  gloriam  adoranda  foret?  Quod  si  eorum  quempiam,  quos  tum  Dominus  prolabi  in  tantam  caecitatem  passus  non  erat,  narrarent  historiae  (2  Reg.  18,  4),  procul  omni  superstitione,  tantum  ut  publicae  populi  insaniae  se  accommodaret,  genu  coram  idolo  illo  incurvasse:  nostrum  opinor  nemo  fuerit,  qui  non  confestim  illam  simulandi  improbitatem  detestetur:  et  sane  communi  piorum  omnium  abominatione  digna  esset.  At  nisi  nobis  frustra  blandimur,  nihilo  nunc  leviore  flagitio  genua  coram  panis  crusta  incurvamus,  quam  tum  inflectere  coram  serpente  licuisset??17*