41:262  sed  admonet  docendum  et  discendum  esse,  etiam  si  variae  mortes  oculis  sese  obiiciant.  Postea  loquitur,  quemadmodum  nuper  dixi,  de  solatio.  Sed  significat  Deum  suis  electis  laturum  opem,  quae  possit  videri  fere  nullius  momenti.  Dicit  enim  adiutum  iri  auxilio  parvo,  quod  etiam  contigit.  Nec  dubium  est  quin  angelus  designet  Mathatiam  et  filios  eius,  quos  vocarunt  Machabaeos.  Et  restringit  adhuc  illud  auxilium,  ubi  adiungit  multos  fore  simulatos  in  illo  exiguo  numero,  nempe  ut  sciamus  quamvis  redigenda  esset  ecclesia  ad  paucitatem,  non  tamen  omnes  fore  integros,  sed  in  magna  parte  fore  multas  fallacias,  quas  angelus  hic  blanditias  appellat.  Haec  fuit  gravissima  tentatio  fidelibus,  quum  cernerent  se  et  paucos  et  debiles,  respectu  hostium:  deinde  non  auderent  sociis  ipsis  fidere,  qui  fidem  dederant  ac  mira  fuerant  polliciti,  quoniam  multi  fallaciter  blandiebantur,  neque  causam  susceperant  sincero  animo.  Diximus  hanc  doctrinam  valde  utilem  esse  nostris  temporibus,  et  debere  etiam  accommodari,  quia  idem  nobis  contingit  quod  veteribus.  Videmus  enim  ex  ingenti  multitudine  eorum  qui  Christiani  haberi  volunt  paucissimos  esse  qui  retineant  purum  Dei  cultum  et  incorruptum,  quoniam  papistae  habent  stabulum  foedum  et  inquinatum  omnibus  sordibus  pro  ecclesia:  illic  tota  pietas  eversa  est,  vel  contaminata  multis  superstitionibus.  Sed  in  exiguo  numero  qui  sese  ab  idololatriis  papatus  subduxerunt,  maior  pars  plena  est  perfidia  et  dolis.  Praeclarum  quidem  zelum  simulant,  si  tamen  intus  excutias,  reperies  plenos  esse  fraudibus.  Iam  si  Deus  magis  ad  vivum  examinet  ecclesiam  suam,  quemadmodum  ante  aliquot  annos  in  Germania  contigit,  et  potest  etiam  nobis  contingere  brevi,  inter  hos  quoque  serios  conflictus,  ac  in  tali  perturbatione  multi  se  venditabunt  pro  fortibus  athletis  quorum  tamen  zelus  statim  diffluet.  Ergo  quum  Dominus  similibus  fere  modis  nos  exerceat,  quibus  veterem  ecclesiam  probavit,  haec  doctrina  semper  nobis  occurrat  in  memoriam,  ne  animi  nostri  liquescant.  Posset  hoc  loco  quaeri  an  angelus  probet  quidquid  susceptum  fuit  a  Machabaeis.  Potest  enim  hoc  disputari  in  utramque  partem.  Primo  loco  si  quis  velit  pertinaciter  ex  verbis  angeli  contendere,  probatum  fuisse  Deo  quidquid  gesserunt  Machabaei,  hoc  parum  erit  firmum.  Deus  enim  potuit  miseris  Israelitis  succurrere  per  Machabaeos,  tamen  non  ideo  sequitur  ipsos  bene  et  legitime  egisse  bonam  causam.  Et  saepe  hoc  contingit,  ut  ipsi  quoque  fideles  velint  impendere  operam  suam  Deo,  et  hoc  unum  habeant  propositum,  tamen  labantur  vel  zelo  inconsiderato,  vel  alia  inscitia.  Quidquid  sit,  saepe  aliquid  rectum  agitur,  neque  tamen  recte.  Quantum  ad  Machabaeos  spectat,  non  dubito  quin  Deus  Mathatiam  excitaverit,  qui  colligeret  dissipatas  reliquias,  et  restitueret  Dei  cultum,  templum  purgaret  17*