47:261  261  CAPUT  XL  262  in  loco  celebri,  in  multa  hominum  frequentia,  et  prope  urbis  portas  quasi  in  theatro  editum,  statim  ex  omnium  oculis  evanescit.  Imo  Iudaei  oculos  maligne  claudendo  data  opera  non  viderunt  quod  sub  oculis  erat.  Nec  vero  novum  est  vel  rarum  ut  homines,  qui  nimis  cupide  semper  miraculis  inhiant,  ad  eorum  considerationem  prorsus  sint  hebetes  ac  stupidi.  Distantia  locorum  quae  notatur  minor  duobus  passuum  millibus  fuit.  Stadium  enim  pedes  sexcentos,  hoc  est,  centum  et  viginti  quinque  passus  continet.  19.  Ut  eas  de  fratre  suo  consolarentur.  Hoc  quidem  spectabant  illi,  at  Deus  aliud,  quemadmodum  dictum  est.  Porro  inde  apparet  domum  Lazari  et  sororum  plenam  fuisse  dignitatis  et  honorifice  cultam.  Caeterum  quia  naturale  est,  ut  luctum  et  moerorem  hominibus  mors  suorum  afferat,  non  improbandum  est  hoc  officium  cuius  meminit  evangelista,  nisi  quod  vitiosus  excessus,  ut  in  aliis  vitae  partibus  hic  quoque  regnans,  rem  per  se  non  vitiosam  corrumpit.  20.  Martha  igitur  quum  audisset  Egreditur  Martha  extra  pagum,  ut  postea  videbimus,  non  tantum  fortassis  reverentiae  causa,  sed  ut  ipsum  occultius  exciperet;  quia  recens  erat  memoria  periculi,  necdum  bene  quieverat  hostium  rabies,  quae  Christi  in  Gfalilaeam  transitu  paululum  sedata  audito  eius  adventu  violentius  de  integro  erumpere  poterat.  21.  Domine,  si  fuisses  hic.  Incipit  a  querimonia,  quanquam  hoc  modo  verecunde  significat  quid  velit.  Perinde  enim  est  ac  si  diceret  :  Poteras  tua  praesentia  fratrem  meum  eripere  a  morte,  imo  nunc  etiam  potes,  quia  nihil  tibi  negabit  Deus.  Sic  autem  loquendo  magis  affectui  suo  indulget  quam  se  contineat  sub  fidei  regula.  Haec  quidem  verba  partim  ex  fide  profecta  esse  fateor,  sed  dico  permixtos  fuisse  incompositos  affectus,  qui  eam  ultra  metas  arriperent.  Nam  quod  fratrem  suum  non  fuisse  moriturum  sibi  promittit  si  affuisset  Christus,  unde  illi  haec  fiducia?  Certe  non  concepta  erat  ex  aliqua  Christi  promissione.  Restat  igitur  ut  temere  suis  votis  potius  obsequatur  quam  se  Christo  subiiciat.  Fidei  est  quod  Christo  potentiam  tribuit  summamque  bonitatem:  quod  autem  sibi  plus  persuadet  quam  a  Christo  audierat,  id  est  a  fide  alienum:  tenendus  enim  semper  est  mutuus  inter  verbum  et  fidem  consensus,  ne  quid  sibi  temere  praeter  Dei  verbum  homo  fabricet.  Adde  quod  in  praesentia  Christi  corporali  nimis  haerebat  Martha.  Ergo  fides  Marthae  immoderatis  votis  permixta  et  implicita,  superstitione  etiam  non  omnino  vacua,  pleno  fulgore  Elucere  non  potuit:  ita  tantum  eius  scintillae  in  his  verbis  emicant.  23.  Resurget  frater  tuus.  Mira  Christi  comitas,  quod  Marthae  in  iis  quae  diximus  vitiis  ignoscens  plus  illi  ultro  promittit  quam  praecise  et  aperte  petere  ausa  fuerat.