10.1:261  CONSILIA.  ut  a  recta  via  declinent,  tolerandi  quidem  illi  videntur.  G-ravius  est  vero  quod  quidam  adeunt  etiam  conciones  monachorum,  qui  verbum  aliquod  veritatis  inspergunt  suis  mendaciis,  ut  ita  gratiam  sibi  concilient.  Quasi  vero  non  ipsi  nimis  propensi  ad  vanitatem  simus,  et  ad  mendacia  ut  novi  magistri  quaerendi  sint,  qui  nos  eo  inducant.  Neque  immerito  illos  punit  Dominus,  qui  talibus  mixturis  delectantur:  ut  re  ipsa  constat  illorum  plurimos  et  a  veritate  deflectere  et  Satanae  imposturis  infici.  Neque  id  aliunde  est  quam  ab  ipsorum  ingratitudine,  quando  purae  doctrinae  non  acquiescunt,  sed  vento  pasci  cupiunt.  Iusto  vero  iudicio  Dominus  istos  inebriari  sinit.  In  genere  cavendum  vobis,  ne  sitis  ex  eorum  numero  qui  semper  discunt,  ut  ait  Paulus,  et  nunquam  scientiam  veritatis  assequuntur  (2  Tim.  3,  7).  Memores  etiam  esse  vos  velimus  illius  Domini  admonitionis,  ut  caveatis  vobis  a  fermento  scribarum  et  Pharisaeorum:  quando  ita  nobis  difficile  est  qui  eo  semel  aliquando  imbuti  fuimus,  ut  eo  vere  expurgemur,  ac  nihil  ex  illa  corruptione  faecis  in  nobis  haereat.  Quid  iis  igitur  fiet,  qui  inter  ilios  etiam  vivere  cupiunt,  atque  ita  sponte  Deum  tentant?  Idem  existimandum  est  de  toto  genere  precularum  quas  horas  et  patinostras  vocant,  et  caeteris  eiusmodi  idololatriae  instrumentis.  Sic  enim  idola  nobis  prorsus  esse  debent  exsecrationi,  ut  ne  illorum  quidem  nomina  nobis  in  ore  sint,  ut  est  in  Psalmo  16  (v.  4).  Cui  respondet  et  illud  Ezechielis  (36,  32),  quod  si  bene  poenitet  anteactae  vitae,  et  viarum  nostrarum  in  quibus  erravimus,  illarum  nos  etiam  non  pudere  non  potest.  Sunt  aliae  corruptelae,  quae  eo  etiam  accedunt.  Aleae  enim  et  quas  cartas  vocant,  ut  ad  superstitiones  non  pertinuerint,  sed  aliorum  vitiorum  fuerint  instrumenta,  multum  quoque  damni  et  malorum  passim  intulerunt.  Ac  quod  ad  istiusmodi  lusus  attinet,  non  ita  prorsus  a  nobis  damnarentur,  si  in  eorum  usu  quod  licet  locum  haberet:  sed  ubinam  exstat  ilia  sobrietas?  Primum  non  est  aliud  uspiam,  quod  ita  homines  quasi  visco  impediat,  adeo  ut  totos  eorum  sensus  occupet,  non  secus  ac  fascino  correptos.  Sed  quemadmodum  qui  illis  assueverunt,  non  ita  possunt  illis  valedicere  :  ita  etiam  qui  pedem  aliquantum  retulerit,  illa  omnia  facile  fastidiet.  Porro  qui  sese  ita  iis  rebus  dedunt,  atque  ita  insanire  pergunt,  incidunt  ��in  multas  molestias.  Notum  est,  vix  unquam  lusus  effluere  sine  blasphemiis,  fraudibus,  atque  excandescentia:  quot  etiam  familiae  inde  accisae.  Nemo  enim  tenet  modum,  quin  sese  exhauriat,  aut  sensim  ipse  consumat.  Maxime  ubi  de  lucrando  agitur,  fieri  vix  potest,  quin  Deus  ipse  laedatur  aliquo  modo.  Quare  magnopere  expedit  ab  illis  esse  alienos,  quantum  fieri  potest.  Optimum  vero  abstinere  prorsus.  j