52:260  v  e  n  i  s  s  e  ut  salvos  faceret  peccatores:  et  eam  praefatione  ornat,  qua  uti  solet  in  rebus  maxime  seriis.  Ut  certe  in  religionis  doctrina  hoc  praecipuum  est  caput,  ad  Christum  venire,  ut,  in  nobis  perditi,  salutem  ab  eo  recuperemus.  Praefatio  ergo  haec  nobis  sit  instar  buccinae  sonantis  ad  publicandum  gratiae  Christi  praeconium,  quo  plus  fidei  apud  nos  habeat:  sit  nobis  quasi  sigillum  ad  imprimendam  cordibus  nostris  de  remissione  peccatorum  fiduciam,  quae  difficulter  alioqui  in  animos  hominum  penetrat.  Quae  etiam  causa  fuit  Paulo  cur  attentionem  excitaret  his  verbis,  fidelis  sermo,  nisi  quia  semper  homines  secum  disceptant  de  sua  salute?  Nam  ut  millies  in  Christo  salutem  nobis  offerat  Deus  pater,  et  Christus  ipse  de  officio  sua  concionetur:  non  tamen  propterea  desinimus  trepidare,  vel  saltem  disputare  nobiscum  an  ita  sit.  Proinde  quoties  nobis  in  mentem  veniet  ulla  de  peccatorum  remissione  dubitatio,  hoc  veluti  clypeo  fortiter  eam  repellere  discamus:  veritatem  esse  indubiam,  et  dignam  quae  absque  controversia  recipiatur.  Peccatores  salvos  faceret.  Subest  in  hoc  verbo  emphasis.  Nam  qui  officium  Christi  esse  fatentur,  salvare,  cogitationem  tamen  hanc  difficilius  admittunt,  quod  eiusmodi  salus  ad  peccatores  pertineat.  Semper  enim  abripitur  sensus  noster  ad  respectum  dignitatis.  Simulatque  indignitas  apparet,  concidit  fiducia.  Proinde  quo  quisque  peccatis  suis  magis  gravatur,  eo  maiore  animo  ad  Christum  confugiat,  hac  scilicet  doctrina  fretus,  venisse  ut  salutem  non  iustis,  sed  peccatoribus  afferat.  Notandum  etiam  est,  Paulum  a  generali  Christi  officio  argumentum  ducere,  ne  absurdum  novitas  faceret  quod  de  sua  persona  nuper  testatus  est.  Quorum  primus  sum  ego.  Cave  existimes  modestiae  causa  apostolum  mentitum  esse.  Veram  enim  non  minus  quam  humilem  confessionem  edere  voluit,  atque  ex  intimo  cordis  sensu  depromptanu  Sed  quaeret  hic  quispiam,  curnam  se  inter  peccatores  praecipuum  numerat,  qui  tantum  sanae  doctrinae  ignorantia  lapsus  est,  alioqui  tota  vita  inculpabilis  apud  homines?  Atqui  his  verbis  admonemur  quam  grave  sit  apud  Deum  et  atrox  crimen  infidelitas:  praesertim  ubi  accedit  obstinatio  et  saeviendi  rabies.  Facile  quidem  est  apud  homines  totum  id,  quod  de  se  confessus  Paulus,  extenuare  colore  zeli  inconsiderati.  Sed  pluris  obedientiam  fidei  facit  Deus  quam  ut  pro  levi  delicto  incredulitatem  cum  pervicacia  coniunctam  ducat.  Quare  diligenter  notandus  est  hic  locus,  hominem  coram  mundo  non  modo  innoxium,  sed  eximiis  virtutibus  praestantem  vitaeque  laudatissimae,  quia  evangelii  doctrinae  fuerit  adversarius,  propter  incredulitatis  suae  contumaciam  unum  ex  gravissimis  peccatoribus  censeri.  Nam  inde  colligere  promptum  est  quid  valeant  coram