51:260  contre  Dieu  et  monstrent  une  rebellion  qui  estoit  auparavant  cachee.  Dont  vient  une  telle  diversite?  C'est  d'autant  que  Dieu  adresse  les  uns  par  son  S.  Esprit,  les  autres  il  les  laisse  en  ceste  corruption  qu'ils  ont  de  nature.  Voila  donc  en  quoy  la  bonte  de  Dieu  a  plus  grand  lustre  envers  nous  :  c'est  d'autant  que  si  l'Evangile  nous  est  presche,  desia  nous  avons  comme  un  signe  que  Dieu  a  eu  pitie  de  nous,  et  qu'il  nous  aime,  et  qu'il  nous  appelle  et  convie  a  soy.  Mais  outreplus,  quand  nous  recevons  de  coeur  et  d'affection  la  doctrine  qui  nous  est  preschee,  voila  encores  un  signe  plus  special  dont  nous  appercevons  que  Dieu  nous  veut  estre  Pere  et  qu'il  nous  a  adoptez  pour  ses  enfans.  S.  Paul  donc  non  sans  cause  dit  en  ce  passage  que  nous  sommes  benits  de  Dieu,  voire  selon  qu'auparavant,  il  nous  avoit  eleus:  car  nous  ne  sommes  pas  venus  a  luy,  nous  ne  l'avons  point  cerche:  mais  il  faut  que  ce  qui  est  dit  par  le  Prophete  Isaie  soit  accompli  en  tous  :  c'est  que  Dieu  s'est  manifeste  a  ceux  qui  ne  s'enqueroyent  point  de  luy,  et  ceux  qui  en  estoyent  bien  eslongnez  Font  veu  prochain,  et  leur  a  dit,  Me  voici,  me  voici:  encores  que  vous  m'ayez  mesprise,  si  est-ce  que  ie  daigne  bien  venir  a  vous,  d'autant  que  i'ay  le  soin  de  vostre  salut.  Nous  voyons  donc  a  quoy  S.  Paul  a  pretendu  en  ce  passage.  En  somme,  nous  avons  ici  a  noter  que  iamais  nous  ne  cognoistrons  dont  nostre  salut  procede,  iusques  a  ce  que  nous  ayons  esleve  nos  sens  a  ce  conseil  eternel  de  Dieu,  par  lequel  il  a  choisi  ceux  que  bon  luy  a  semble,  laissant  les  autres  en  leur  confusion  et  ruine.  Or  si  d'aucuns  trouvent  estrange  ceste  doctrine,  et  dure,  il  ne  s'en  faut  point  esbahir;  car  cela  ne  s'accorde  gueres  bien  au  sens  naturel  des  hommes.  Qu'on  aille  s'enquerir  des  Philosophes,  ils  diront  tousiours  que  Dieu  aime  ceux  qui  en  sont  dignes:  et  d'autant  que  la  vertu  luy  plaist,  que  aussi  il  marque  ceux  qui  y  sont  adonnez,  pour  les  retenir  comme  son  peuple.  Voila  donc  ce  que  nous  pourrons  iuger  a  nostre  fantasie,  qu'il  n'y  a  autre  distinction  que  Dieu  ait  des  hommes  pour  aimer  les  uns  et  hayr  les  autres,  sinon  d'autant  que  chacun  en  est  digne,  et  qu'il  l'a  desservi.  Mais  cependant  pensons  aussi  qu'en  nostre  sens  il  n'y  a  que  vanite,  et  qu'il  ne  faut  point  mesurer  Dieu  a  nostre  aulne,  et  que  c'est  une  outrecuidance  trop  enorme,  quand  nous  voudrons  imposer  loy  a  Dieu,  tellement  qu'il  ne  luy  soit  licite  de  faire  sinon  ce  que  nous  concevons,  et  qui  nous  semble  iuste.  Il  est  donc  ici  question  d'adorer  les  secrets  de  Dieu  qui  nous  sont  incomprehensibles.  Et  sans  cela  iamais  nous  ne  gousterons  les  principes  de  la  foy.  Car  nous  scavons  que  nostre  sagesse  doit  commencer  tousiours  par