10.1:260  hoc  non  aliud  esse  potest,  quam  tantundem  derogare  unico  Christi  Domini  nostri  sacrificio,  quando  purgatorium  solis  humanis  satisfactionibus  nititur.  Videte  igitur  an  illud  sit  excusabile,  et  an,  ubi  quis  ita  scandalizaverit  ecclesiam,  dissimulari  debeat,  aut  pro  levi  delicto  tolerari:  ac  non  potius  eam  reprehensionem  mereatur,  quae  illum  moneat,  ut  sit  cautior  in  posterum,  cui  tale  aliquid  acciderit.  Scimus  in  quibus  versemini  angustiis,  ac  vobis  quoque  pro  caritatis  officio  condolemus:  sed  quia  nihil  iuvaret  a  nobis  absolvi,  sinite  in  vos  potius  ex  Dei  verbo  ferri  sententiam,  ut  totum  istud  vestro  bono  et  saluti  cedat.  Audimus  aliud  inter  vos  disceptari:  nempe  an  liceat  cuiquam  ingerere  sese  ad  praedicationem  eo  loci  ubi  ecclesia  reformata  exstet,  etiamsi  ab  ecclesia  hoc  ratum  habitum  non  sit.  Atque  ut  quis  ita  se  gesserit,  an  etiam  liceat  ad  illum  audiendum  venire.  Hic  autem  oramus  ut  diligenter  attendatis,  utcunque  Dominus  inter  vos  corpus  aliquod  ecclesiae  constituerit,  inde  non  sequi,  multa  non  esse  toleranda  in  aictCta  publica  quae  istic  adhuc  viget,  quae  in  ecclesia  bene  constituta  ferenda  non  essent.  Non  loquimur  de  illis  actionibus,  in  quibus  peccatur  in  Deum,  quaeque  ipsius  verbo  repugnant.  Sed  quum  miseri  papistae  sint  ut  oves  dispersae,  ubi  Dominus  excitat  certos  homines,  qui  illos  ex  dissipatione  colligant,  tantum  abest  ut  talem  opem  illis  oblatam  impedire  ipsi  debeamus,  ut  potius  eo  casu  nobis  usurpandum  sit  illud  Domini,  ut  habeamus  pro  nostris  tum,  qui  non  sint  adversum  nos  (Luc.  9,  50).  Quia  hic  non  agitur  de  munere  pastoris,  sed  tantum  de  illius  opera,  qui  ita  docet,  ut  sensim  ad  Christum  adducat  qui  erant  prius  dispersi.  Non  agitur  etiam  de  ordine  perpetuo:  sed  de  medio  quodam  extraordinario,  quo  Dominus  utitur  in  confusione  papatus.  Recordamini  etiam  illius  apostoli  sententiae,  quod  qui  non  sunt  ecclesiae  domestici,  ipsius  regulae  et  statutis  non  sint  subiecti  (1.  Cor.  5,  12).  Observandum  denique  quod  alibi  tradit  idem  apostolus,  offerri  nempe  gaudii  materiam,  ubi  evangelium  promovetur,  etiamsi  hoc  per  occasionem  fiat  (Philip.  1,  18).  Quamobrem  nobis  non  videtur  interdicendum  fidelibus  ab  istorum  praedicatione,  modo  illic  exstet  proba  et  pura  doctrina:  absit  autem  precatio  omnis  superstitiosa,  aut  quaevis  alia  mixtura.  Neque  tamen  hoc  eo  pertinet,  ut  inde  occasionem  captent  subducendi  se  a  coetu  ordinario,  aut  etiam  segnius  conveniendi  ad  ordinarium  pastorem  audiendum.  Incitandi  sunt  potius  et  confirmandi  ad  tenendum  ordinem,  in  quem  ipsos  semel  introduxit  Dominus.  Ac  proinde  attendite  vobis,  ne  circumveniamini  ab  illis  qui  obliqua  via  tentant  abducere  oves  a  grege,  ut  a  pastu  ordinario  alienas  reddant.  Interea  si  qui  illos  adeunt  non  curiositate  quadam  illecti,  neque