41:26  se  potestate  terreni  principes  dum  insurgunt  contra  Deum:  imo  indigni  sunt  qui  censeantur  in  hominum  numero.  Potius  ergo  conspuere  oportet  in  ipsorum  capita  quam  illis  parere,  ubi  ita  proterviunt  ut  velint  etiam  spoliare  Deum  iure  suo,  et  quasi  occupare  solium  eius,  ac  si  possent  eum  e  coelo  detrahere.  Nunc  ergo  tenemus  sensum  huius  loci.  Sequitur,  23.  Tunc  rex  valde  exhilaratus  in  se  (vel,  super  eo)  Danielem  iussit  educi  ex  spelunca  :  et  eductus  fuit  Daniel  ex  spelunca:  et  nulla  corruptio  (vel,  laesio)  inventa  fuit  in  eo:  quia  credidit  (vel,  confisus  est)  Deo  suo.  Confirmat  Daniel  quod  prius  narravit  de  affectu  regis  Darii.  Sicuti  ergo  anxius  recesserat  in  palatium,  abstinuerat  a  cibo  et  potu,  et  abiecerat  omnes  voluptates  et  delitias:  sic  etiam  gravisus  est,  quum  audiret  sanctum  Dei  servum  mirabiliter  ereptum  esse  a  morte.  Postea  adiungit,  Et  iussu  regis  eductus  fuit  Daniel  e  spelunca:  et  nulla  corruptio  inventa  in  eo  fuit.  Hoc  non  potuit  adscribi  fortunae.  Ergo  illustravit  Deus  virtutem  suam,  quod  ita  evasit  salvus  Daniel,  ut  leones  eum  non  attigerint.  Discerptus  quidem  fuisset,  si  Deus  non  clausisset  leonum  ora:  sed  hoc  etiam  non  parum  valuit  ad  amplificandum  miraculum,  quod  nulla  laesio,  nullus  tactus  inventus  fuit  in  eius  corpore.  Quod  ergo  ei  sic  leones  pepercerint,  factum  est  arcano  Dei  auxilio:  et  hoc  etiam  clarius  innotuit,  ubi  proiecti  sunt  eius  calumniatores  in  speluncam,  quia  statim  lacerati  ac  vorati  sunt  a  leonibus,  sicuti  paulo  post  subiiciet.  Sed  notanda  est  ratio,  quae  additur,  fuisse  servatum,  quoniam  crediderit  Deo  suo.  Saepe  enim  continget,  ut  quis  tueatur  bonam  causam,  et  tamen  male  ac  infeliciter  succedat  :  quia  scilicet  fiducia  consilii  sui,  et  prudentia,  et  industria  aggreditur  quod  alioqui  laude  dignum  erat.  Non  mirum  igitur  est,  si  saepe  destituatur  prospero  successu,  qui  tamen  suscipiunt  bonas  causas  tuendas:  quemadmodum  in  profanis  omnibus  apparet.  Nam  historiae  omnium  aetatum  hoc  testantur,  saepe  periisse  eos  qui  tamen  iustam  causam  fovebant:  sed  hoc  factum  est  perversa  eorum  fiducia,  quoniam  scilicet  non  erat  illis  propositum,  Deo  servire:  potius  spectabant  laudem  et  plausum  mundi.  Ut  ergo  rapiebat  eos  ambitio,  sic  etiam  placebant  sibi  in  propriis  consiliis.  Et  hinc  manavit  dictum  illud  Bruti,  Virtutem  esse  rem  frivolam:  quia  putabat  indigne  secum  agi,  quod  quum  pugnasset  pro  tuenda  libertate  populi  romani,  tamen  non  haberet  deos  propitios,  sed  infensos.  Quasi  vero  debuerit  Deus  ei  suum  auxilium,  quod  nunquam  speraverat,  neque  unquam  petierat.  Scimus  enim  quam  superbo  fuerit  ingenio  vir  ille.  Ego  profero  unum  exemplum:  sed  si  diligenter  ex-