35:26  d'autant  plus  qu'ils  auront  vescu  long  temps,  ils  auront  despendu  beaucoup  de  pain,  estans  nourris  aux  despens  de  Dieu:  tellement  qu'il  vaudroit  mieux  par  maniere  de  dire,  qu'un  boeuf  eust  este  nourri:  cela  seroit  plus  supportable.  Ainsi  donc  apprenons,  d'autant  que  Dieu  distribue  de  son  Esprit  a  ceux  qu'il  veut  appliquer  a  son  service  que  d'autant  mieux  s'y  doivent-ils  employer  soigneusement  et  en  crainte  de  Dieu.  Que  s'ils  en  font  autrement,  ceux  qu'on  estimera  les  plus  sages,  on  verra  qu'ils  seront  du  tout  aveuglez,  quand  ils  ne  cognoistront  point  Dieu,  comme  notamment  il  en  fait  la  menace  par  son  Prophete  Isaie,  disant  (29,  14),  Que  les  anciens  ne  verront  plus  goutte,  que  les  sages  s'abbrutiront,  et  seront  du  tout  eslourdis.  Nous  voyons  donc  comme  Dieu  declare  une  vengeance  plus  horrible  sur  les  grans  et  sur  les  anciens,  et  sur  les  gouverneurs,  que  sur  le  commun  peuple.  Par  cela  nous  sommes  admonnestez  qu'il  ne  nous  leur  faut  point  attribuer  une  autorite  infallible,  comme  si  iamais  ils  ne  pouvoyent  errer,  et  mal  conduire  les  autres.  Or  si  Dieu  aveugle  ainsi  les  anciens  et  les  grans,  et  ceux  qui  sont  en  autorite  (ie  vous  prie)  quand  il  ne  leur  donne  point  de  son  sainct  Esprit,  que  seront-ils  plus?  Et  notons  bien  la  cause  pourquoy  Dieu  fait  une  telle  menace.  C'est  pour  l'hypocrisie  des  hommes  d'autant  qu'ils  l'ont  servi  par  contenance,  et  que  leur  coeur  estoit  loin  de  luy:  que  de  bouche  ils  ont  proteste  de  le  vouloir  servir,  et  cependant  ils  se  sont  addonnez  aux  traditions  des  hommes:  c'est  a  dire  que  Dieu  n'a  point  domine  luy  seul  par  sa  parole,  mais  que  les  hommes  ont  la  vogue.  Or  Dieu  ne  peut  souffrir  que  son  autorite  soit  ainsi  amoindrie.  Voila  pourquoy  il  dit,  qu'il  aveuglera  les  sages,  qu'il  ostera  l'Esprit  et  la  raison  aux  anciens.  Apprenons  donc  si  nous  voulons  que  Dieu  nous  gouverne,  et  qu'il  regne  au  milieu  de  nous,  et  iouir  des  graces  qui  nous  sont  necessaires  a  salut,  qu'il  luy  faut  laisser  la  domination  et  maistrise  sur  nous  tous,  et  que  grans  et  petis  se  rengent  a  son  obeissance.  Et  au  reste  que  nous  ayons  sa  parole  pour  nostre  regle,  et  gue  nous  souffrions  d'estre  gouvernez  par  icelle:  sachans  qu'autrement  nous  ne  pouvons  pas  attendre  que  le  sainct  Esprit  besongne  en  nous.  Et  pourtant  que  nous  cerchions  tous  les  moyens  qu'il  est  possible  d'estre  enseignez.  Dieu  a  voulu  qu'il  y  eust  des  Pasteurs  en  son  Eglise  qui  annoncassent  sa  parole,  et  que  nous  receussions  correction  et  admonition  d'eux.  Cela  ne  se  fait-il  point  en  telle  vertu  qu'il  faut?  Prions  a  Dieu  qu'il  luy  plaise  suppleer  a  un  tel  deffaut.  Que  donc  nous  cheminions  en  telle  humilite,  que  nous  ne  demandions  sinon  que  Dieu  seul  ait  toute  preeminence  sur  nous:  et  sachons  que  nous  ne  pouvons  avoir  ne  raison  ni  intelligence,  sinon  en-