33:26  iette  Esau,  et  l'avoit  maudit  avec  tout  son  lignage.  Voila  comme  le  Prophete  en  parle  pour  magnifier  la  misericorde  de  Dieu  envers  les  Iuifs,  leur  monstrant  qu'il  ne,  les  avoit  pas  eleus  pour  quelque  dignite  qui  fust  en  leurs  personnes,  veu  qu'il  a  reiette  le  frere  aisne  de  Iacob,  auquel  appartenoit  la  primogeniture,  et  qu'il  avoit  choisi  celui  qui  estoit  le  moindre,  et  l'inferieur.  Ainsi  donc  combien  que  cest  homme  fust  descendu  de  la  lignee  d'Esau  toutesfois  si  est-ce  que  nous  voyons  en  quelle  integrite  il  a  vescu,  et  comme  il  a  servi  a  Dieu,  non  seulement  quant  a  converser  avec  les  hommes  en  droiture,  et  equite  :  mais  pour  avoir  une  religion  pure,  qu'il  ne  se  polluoit  point  aux  idolatries  et  superstitions  des  infideles.  Quant  a  ce  nom  de  Iob,  il  est  vray  qu'aucuns  le  translatent  comme  pleurant,  ou  criant:  mais  les  autres  le  prenent  comme  un  homme  d'inimitie,  non  pas  qu'il  haist,  mais  qu'il  estoit  comme  un  blanc,  auquel  on  pouvoit  tirer.  Tant  y  a  que  nous  ne  devons  point  douter,  que  cest  homme,  duquel  le  pays  est  icy  marque,  duquel  le  nom  est  exprime,  n'ait  este,  qu'il  n'ait  vescu,  et  que  les  choses  qui  sont  ici  escrites  ne  luy  soyent  advenues:  a  fin  que  nous  ne  pensions  point  que  ce  soit  un  argument  controuve,  comme  si  sous  quelque  nom  on  nous  proposoit  ici  ce  qui  n'a  iamais  este  fait.  Car  nous  avons  desia  allegue  le  tesmoignage  d'Ezechiel,  et  celuy  de  sainct  Iaques,  qui  monstrent  bien  que  Iob  a  este  a  la  verite,  et  aussi  quand  l'histoire  le  declare,  nous  ne  pouvons  point  effacer  ce  que  le  Sainct  Esprit  a  voulu  dire  si  notamment.  Or  au  reste  nous  avons  a  noter,  que  de  ce  temps  la,  combien  que  le  monde  se  fust  aliene  du  vray  service  de  Dieu,  et  de  la  pure  religion,  neantmoins  qu'il  y  avoit  encores  plus  d'integrite  beaucoup,  qu'il  n'y  a  point  auiourd'huy,  mesmes  en  la  Papaute.  Et  de  fait  nous  voyons  comme  du  temps  d'Abraham  Melchisedech  avoit  Eglise  de  Dieu,  et  avoit  les  sacrifices,  qui  estoyent  sans  pollution  aucune.  Et  ainsi  combien  que  la  plus  part  du  monde  fust  enveloppee  en  beaucoup  d'erreurs,  et  de  fausses  fantasies,  et  meschantes,  toutesfois  Dieu  avoit  reserve  quelque  petite  semence  a  soy,  et  y  en  avoit  tousiours  d'aucuns  qui  estoyent  retenus  sous  la  pure  verite,  voire  en  attendant  que  Dieu  establist  son  Eglise:  et  qu'il  choisist  un  peuple,  c'est  a  savoir,  les  successeurs  d'Abraham,  a  fin  qu'ils  cogneussent  qu'ils  estoyent  separez  du  reste  de  tout  le  monde.  Or  il  est  bien  vray  que  Iob  a  vescu  depuis  ce  temps  la,  mais  l'Eglise  de  Dieu  n'estoit  pas  encores  ainsi  dressee,  comme  elle  a  este  depuis:  car  nous  savons  cependant  que  les  enfans  d'Israel  ont  vescu  en  Egypte,  qu'il  sembloit  que  tout  devoit  estre  aneanti.  Et  mesmes  nous  voyons  a  quelle  extremite  ils  sont  venus  en  la  fin,  quand  Pharao  commande  que  les