32:26  si  dictum  esset,  iudicium  aptabitur  vel  conformabitur  iustitiae.  Iudicium  porro  hic,  sicut  multis  aliis  locis,  pro  gubernatione  accipitur,  vel  publico  statu.  Iam  quia  rebus  in  mundo  turbatis  videtur  iniquum  ac  perversum  esse  regimen,  ideo  promittit  meliorem  exitum.  Nec  tantum  dicit  redituros  ad  aequitatem  homines  qui  prius  inordinate  dominati  fuerint,  sed  altius  penetrat,  Dominum  tandem  in  restituenda  ecclesia  iustitiam  quam  occultaverit  patefacturum  :  non  quod  eius  providentia  unquam  a  recto  ordine  vel  minimum  deflectat,  sed  quia  hominum  respectu  non  semper  apparet  talis  moderatio  vel  temperamentum  ut  conspicua  sit  illius  iustitia:  quae  iusta  gubernatio  dicitur  ubi  correcta  est  inaequalitas.  Nam  sicuti  nocte  vel  tempore  nubilo  lumen  solis  absconditum  est,  ita  dum  impii  homines  tyrannice  bonos  vexant,  et  eorum  libidini  ac  sceleribus  laxantur  habenae,  inter  nos  et  Dei  providentiam  interpositae  nebulae  lucem  aequitatis  obscurant,  et  ita  quodammodo  iudicium  a  iustitia  distrahitur.  Rebus  autem  in  verum  ordinem  restitutis,  optimus  imperii  et  itfetitiae  consensus  in  moderata  aequalitate  apparet.  Fide  quidem  in  rebus  confusis  iustitiam  Dei,  licet  absconditam,  apprehendere  nos  decet:  sed  hoc  ad  sensum  et  experientiam  refertur,  quod  tanquam  sereno  coelo  fulgebit  Dei  iustitia.  (Post  eum  omnes  recti  corde.)  Vertunt  aliqui,  post  eam  iustitiam,  sed  quia  nomen  hoc  accipitur  pro  aequali  et  ordinato  regimine,  quum  Deus  vindictam  sumit  de  improbis  et  suos  liberat:  non  videtur  congruere  illa  expositio.  Malo  igitur  de  ipso  Deo  intelligere,  atque  ita  erit  relativum  sine  antecedente.  Neque  enim  Hebraeis  rarum  est,  ubi  Dei  fit  mentio,  nominis  eius  loco  ponere  relativum.  Sensus  ergo  est,  iustos  omnes,  ubi  Deus  statum  mundi  composuerit,  sumpturos  animum  ut  eum  alacrius  sequantur.  Etsi  enim  etiam  crucem  ferendo  per  aerumnas  et  afflictiones  ad  eum  adspirant,  ubi  tamen  sentiunt  liberatorem,  et  talem  conspiciunt  eius  manum,  plenius  ei  sese  addicunt.  16.  Quis  surget  mihi  cum  adversantibus?  quis  se  statuet  mihi  cum  operariis  iniquitatis?  17.  Nisi  Iehova  auxilio  fuisset  mihi,  propemodum  habitasset  in  silentio  anima  mea.  18.  Si  dixi,  Lapsus  est  pes  meus:  bonitas  tua  Iehova  sustinuit  me.  19.  In  multitudine  cogitationum  mearum,  in  medio  mei  consolationes  tuae  exhilarant  animam  meam.  16.  (Quis  surget)  Hic  propheta  quasi  per  hypotyposin  demonstrat  quantopere  fuerit  destitutus  hominum  auxilio.  Nam  quasi  in  re  praesenti  exclamat,  Quis  stabit  pro  me?  vel,  se  opponet  hostibus  meis  ?  ac  sibi  continuo  respondet,  Nisi  Deus  tulisset  opem,  actum  de  sua  salute  fuisse.  Hoc  vero  ad  amplificandam  Dei  gratiam  valet,  dum  se  praedicat