31:26  ce  qu'incontinent  apres  ie  me  retiray  de  la:  ioint  mesmement  que  personne  ne  sceut  la  que  i'en  fusse  l'autheur:  comme  aussi  par  tout  ailleurs  ie  n'en  ay  point  fait  de  semblant,  et  avoye  delibere  de  continuer  de  mesme  iusqu'a  ce  que  finalement  maistre  Guillaume  Farel  me  reteint  a  Geneve,  non  pas  tant  par  conseil  et  exhortation,  que  par  une  adiuration  espovantable,  comme  si  Dieu  eust  d'enhaut  estendu  sa  main  sur  moy  pour  m'arrester.  Pource  que  pour  aller  a  Strasbourg,  ou  ie  vouloye  lors  me  retirer,  le  plus  droit  chemin  estoit  ferme  par  les  guerres,  i'avoye  delibere  de  passer  par  yci  legerement,  sans  arrester  plus  d'une  nuit  en  la  ville.  Or  un  peu  au  paravant  la  Papaute  en  avoit  este  chassee  par  le  moyen  de  ce  bon  personnage  que  i'ay  nomme,  et  de  maistre  Pierre  Viret  :  mais  les  choses  n'estoyent  point  encore  dressees  en  leur  forme,  et  y  avoit  des  divisions  et  factions  mauvaises  et  dangereuses  entre  ceux  de  la  ville.  Adoncques  un  personnage,  lequel  maintenant  s'est  vilenement  revolte  et  retourne  vers  les  Papistes,  me  descouvrit  et  feit  cognoistre  aux  autres.  Sur  cela  Farel  (comme  il  brusloit  d'un  merveilleux  zele  d'avancer  l'Evangile)  feit  incontinent  tous  ses  efforts  pour  me  retenir.  Et  apres  avoir  entendu  que  i'avoye  quelques  estudes  particulieres  ausquelles  ie  me  vouloye  reserver  libre,  quand  il  veit  qu'il  ne  gaignoit  rien  par  prieres,  il  veint  iusqu'a  une  imprecation,  qu'il  pleust  a  Dieu  de  maudire  mon  repos  et  la  tranquillite  d'estudes  que  ie  cherchoye,  si  en  une  si  grande  necessite  ie  me  retiroye  et  refusoye  de  donner  secours  et  aide.  Lequel  mot  m'espovanta  et  esbransla  tellement,  que  ie  me  desistay  du  voyage  que  i'avoye  entreprins:  en  sorte  toutesfois  que  sentant  ma  honte  et  ma  timidite,  ie  ne  voulus  point  m'obliger  a  exercer  quelque  certaine  charge.  Apres  cela  a  grand'  peine  se  passerent  quatre  mois,  que  d  un  coste  les  Anabaptistes  nous  veinrent  assaillir,  et  de  l'autre  un  meschant  apostat,  lequel  estant  secretement  soustenu  et  appuye  du  credit  d'aucuns  des  principaux,  nous  pouvoit  beaucoup  faire  de  fascherie.  Cependant  surveinrent  en  la  ville  seditions  les  unes  sur  les  autres,  qui  nous  affligerent  et  proumenerent  d'une  facon  qui  n'estoit  point  lasche.  Ainsi,  combien  que  ie  me  recognoy  estre  timide,  mol  et  pusillanime  de  ma  nature,  il  me  falut  toutesfois  des  les  premiers  commencemens  soustenir  ces  flots  tant  impetueux:  ausquels  ia  soit  que  ie  ne  succombasse  pas,  si  est-ce  que  ie  ne  me  trouvay  point  garni  d'une  si  grande  magnanimite,  que  quand  par  le  moyen  de  certains  troubles  on  me  chassa,  ie  ne  m'en  resiouisse  plus  qu'il  ne  faloit.  Lors  par  ce  moyen  estant  en  liberte  et  quitte  de  ma  vocation,  i'avoye  delibere  de  vivre  en  repos  sans  prendre  aucune  charge  publique,  iusques  a  ce  que  l'excellent  serviteur  de  Christ  Martin  Bucer,