3:26  avec  la  multitude,  quand  il  a  dissipé  tout  le  monde  par  le  deluge,  reservé  Noé  avec  sa  petite  famille:  à  ce  que  par  la  foy  de  luy  seul  il  condamnast1)  tout  le  monde  (Gen.  7,  1;  Heb.  11,  7).  En  somme,  mauvaise  coustume  n'est  autre  chose  qu'une  peste  publique,  en  laquelle  ceux  qui  meurent  entre  la  multitude,  ne  perissent  pas  moins  que  s'ils  perissoyent  seuls.  Davantage  il  falloit  considerer  ce  que  dit  sainct  Cyprien  en  quelque  passage,  assavoir  que  ceux  qui  faillent  par  ignorance,  combien  qu'ils  ne  soyent  pas  du  tout  sans  coulpe,  toutesfois  peuvent  sembler  aucunement  excusables,  mais  que  ceux  qui  avec  obstination  reiettent  la  verité,  quand  elle  leur  est  offerte  par  la  grace  de  Dieu,  ne  peuvent  pretendre  aucune  excuse.2)  Ils  ne  nous  pressent  pas  si  fort  par  leur  autre  argument,  qu'ils  nous  contraignent  de  confesser,  ou  que  l'Eglise  ait  esté  morte  par  quelques  années,  ou  que  maintenant  nous  ayons  combat  contre  l'Eglise.  Certes  l'Eglise  de  Christ  a  vescu  et  vivra  tant  que  Christ  regnera  à  la  dextre  de  son  Pere:  de  la  main  duquel  elle  est  soustenue,  de  la  garde  duquel  elle  est  armée,  de  la  vertu  duquel  elle  est  fortifiée.  Car  sans  doute  il  accomplira  ce  qu'il  a  une  fois  promis,  c'est  qu'il  assisteroit  aux  siens  iusques  à  la  consommation  du  siecle  (Matth.  28,  20).  Contre  ceste  Eglise  nous  n'entreprenons  nulle  guerre.  Car  d'un  consentement  avec  tout  le  peuple  des  fideles,  nous  adorons  et  honorons  un  Dieu  et  un  Christ  le  Seigneur,  comme  il  a  esté  tousiours  adoré  de  ses  serviteurs.  Mais  eux  ils  sont  bien  loin  de  la  verité,  quand  ils  ne  recognoissent  point  d'Eglise,  si  elle  ne  se  voit  presentement  à  l’oeil,  et  la  veulent  enclorre  en  certains  limites,  ausquels  elle  n'est  nullement  comprinse.  C'est  en  ces  poincts  que  gist3)  nostre  controversie.  Premierement,  qu'ils  requierent  tousiours  une  forme  d'Eglise  visible  et  apparente.  Secondement,  qu'ils  constituent  icelle  forme  au  siege