28:26  l'entour  du  toict.  Ceci  est  pour  les  maisons  de  Iudee.  Car  on  bastissoit  la  a  platte  forme  :  comme  encores  en  ces  pais  d'Orient  on  a  retenu  cela  iusques  auiourd'huy.  Et  voila  pourquoy  nostre  Seigneur  Iesus  Christ  disoit:  Vous  prescherez  sur  les  toicts  ce  que  vous  oyez  maintenant  en  secret.  Quand  nous  lisons  ce  passage,  si  nous  regardons  a  la  forme  de  bastir  qui  est  en  usage  en  ces  regions  ici,  il  nous  sembleroit  estrange.  Et  comment  montera-on  sur  un  toict  pour  parler?  Mais  cela  est,  comme  si  on  avoit  quelque  tournelle,  et  qu'on  se  pourmenast  la  dessus.  Or  s'il  n'y  eust  eu  des  barres,  c'estoit  pour  estre  en  danger  de  tomber.  Car  les  enfans  montoyent  sur  le  toict  de  la  maison,  et  c'eust  este  pour  en  faire  mourir  beaucoup  par  inadvertance  :  que  maintenant  un  serviteur  fust  tombe,  maintenant  une  chambriere,  apres  l'enfant:  chacun  donc  eust  este  en  danger.  Or  nostre  Seigneur  commande  qu'on  provoye  a  cela,  et  qu'on  face  des  barres  par  les  maisons.  Or  il  nous  faut  tousiours  adviser  en  premier  lieu  a  quoy  se  rapportent  toutes  ces  sentences  qui  sont  ici  contenues.  Suyvant  la  clef  que  nous  avons  desia  donnee,  qu'il  n'y  a  que  dix  articles,  pour  bien  reigler  toute  nostre  vie,  il  ne  nous  faut  point  aller  cercher  cinq  pieds  en  un  mouton  (comme  on  dit):  que  nous  ayons  tousiours  cela,  que  Dieu  a  donne  une  reigle  parfaite  de  toute  iustice  et  droicture,  quand  il  a  comprins  sa  Loy  en  deux  tables  et  en  dix  parolles.  Or  maintenant,  quand  il  est  ici  parle  de  bastir  tellement  sa  maison  qu'on  n'y  mette  point  de  sang:  par  cela  nous  voyons,  que  nostre  Seigneur  nous  a  declaire  combien  la  vie  de  toutes  creatures  humaines  nous  doit  estre  precieuse��  Voila  un  item.  Et  ainsi,  nous  avons  l'exposition  de  ce  commandement:  Tu  ne  tueras  point.  Est-ce  assez  qu'on  s'abstienne  de  meurtrir,  et  couper  la  gorge,  et  de  battre,  et  molester  son  prochain?  Il  est  vray  qu'on  a  cela  en  horreur,  quand  on  en  parle  seulement  en  langage  commun:  mais  Dieu  a  regarde  plus  loin,  quand  il  a  defendu  les  meurtres.  Pourquoy  est-ce?  Venons  a  ceste  raison:  pource  que  la  vie  des  hommes  luy  est  precieuse,  il  s'ensuit  donc  que  nous  devons  conserver  entant  qu'en  nous  sera  la  vie  de  nos  prochains:  qu'encores  que  nous  ne  commettions  nulle  violence,  nous  ne  serons  point  quittes:  mais  il  nous  faut  adviser  qu'un  chacun  vive  sans  nuisance,  et  que  nous  ne  soyons  point  ni  cause,  ni  occasion  qu'il  advienne  quelque  mal  ou  dommage  a  nos  prochains.  Voila  donc  comme  nostre  Seigneur  nous  a  mieux  declaire  en  ce  passage  ce  qu'il  avoit  dit  auparavant:  Tu  ne  tueras  point.  Et  ainsi,  selon  la  reigle,  il  nous  faut  venir  au  commandement  prefix  et  expres:  Tu  ne  tueras  point.  Et  bien,  Dieu  ne  fait  la  qu'une  defense  simple:  mais  de  la  il  nous  faut  tascher  de  maintenir  la  vie  de  nos  prochains  entant  qu'en  nous