25:26  militem.  Aegyptios  dicit  se  evocaturum  sibilo:  Chaldaeos  se  excitaturum  clangore  tubae.  Sed  quia  haec  satis  trita  est  doctrina,  pluribus  testimoniis  opus  non  est.  Summa  est,  bella  omnia  Dei  imperio  excitari,  armari  ad  eius  mandatum  milites,  et  fortes  esse  eius  virtute.  Unde  sequitur,  praesto  esse  innumeras  copias,  quarum  manu,  quoties  visum  fuerit,  vindictam  suam  exsequatur.  Porro  quum  subinde  vexati  fuerint  Israelitae,  et  crudeliter  etiam  oppressi  a  suis  hostibus,  assiduis  illis  cladibus  patefacta  fuit  Dei  veritas:  sicuti  ex  tanta  eius  severitate  colligere  licet  quam  perversi  fuerint  populi  mores.  26.  Dum  confregero  vobis  baculum  panis.  His  verbis  significat  Deus,  quamvis  eos  terrae  sterilitate  non  puniat,  se  tamen  ad  eos  fame  conficiendos  aliis  modis  instructum  esse.  Videbimus  quidem  postea,  terram  offenso  Deo  viscera  sua  quodammodo  claudere,  ne  alimenta  producat:  coelum  quoque  obdurescere,  ne  eam  foecundet  rore,  et  pluvia:  omnis  denique  coeli  intemperies,  terraeque  ariditas  signum  est  maledictionis  Dei:  verum  nunc  longius  progreditur:  quamvis  inedia  non  laborent,  fore  tamen  famelicos,  ubi  vim  alendi  pani  abstulerit.  Haec  autem  maledictio,  quam  alibi  vidimus  doctrinam  confirmat:  Non  vivere  hominem  pane,  sed  mandato  Dei,  non  secus  ac  si  ex  eius  ore  flueret  facultas  pani  indita.  Nec  certe  sensus  nostros  res  inanimis  vegetaret,  nisi  arcana  Dei  ordinatione.  Aptissima  autem  similitudine  utitur,  baculum  nominans  fulturam  panis,  qua  recreantur  vires  hominum:  quemadmodum  videmus  senes  ac  debiles  scipionibus  innixos  incedere,  qui  alioqui  vacillarent  ac  conciderent.  Verum  Deus  in  arbitrio  suo  esse  dicit  frangere  baculum,  ut  panis  nihil  aliud  quam  ventrem  oneret,  vires  autem  non  reficiat.  Hanc  figuram  mutuatus  est  Ezechiel  a  Mose,  quam  inculcat  pluribus  locis  (Ezech.  4,  16  et  5,  17  et  14,  13).  Quanquam  illic  duos  poenarum  modos  recenset,  sicut  et  alter  propheta  (Aggaei  1,  6)  :  Seminastis  multum,  intulistis  parum:  comedistis,  et  non  estis  saturati:  bibistis,  et  non  estis  inebriati:  operuistis  vos,  et  non  estis  calefacti:  et  qui  mercedem  collegit,  ac  si  misisset  in  sacculum  pertusum.  Item:  Exspectastis  amplius,*et  ecce  diminutum  est:  intulistis  in  domum,  et  exsufflavi.  Penuriam  enim  annonae  unum  Dei  flagellum  esse  docet:  alterum  vero,  quod  nullus  sit  copiae  usus.  Concinit  et  Micheas  (6,  14):  postquam  enim  dixit:  Comedes,  et  non  satiaberis:  adiungit,  Seminabis,  et  non  metes,  calcabis  oleum,  et  non  ungeris  oleo,  calcabis  mustum,  nec  vinum  bibes.  Verum  Moses  quo  magis  appareat  maledictio,  dicit  fore  panis  abundantiam:  deinde  in  ipso  pinsendo  et  coquendo  nullum  fore  dolum:  quia  decem  mulieres  simul  venient  ad  clibanum  unum,  quae  ultro  citroque  observent  an  fideliter  reddatur  pondus.  [Intelligit