2:26  debuerat.  Est  hic  divini  verbi  quidam  quasi  genius,  ut  nunquam  emergat,  quieto  ac  dormiente  satana.  Haec  certissima  et  in  primis  fidelis  nota,  qua  discernitur  a  mendacibus  doctrinis,  quae  se  facile  produnt  dum  aequis  omnium  auribus  recipiuntur  et  a  mundo  plaudente  audiuntur.  Sic  saeculis  aliquot,  quibus  profundis  tenebris  submersa  fuerunt  omnia,  huic  mundi  domino  cuncti  fere  mortales  ludus  erant  ac  iocus,  nec  secus  ac  Sardanapalus  aliquis  in  alta  pace  desidebat  ac  deliciabatur.  Quid  enim  aliud  quam  risisset  ac  lusisset,  tranquilla  ac  pacata  regni  possessione?  At  vero  ubi  lux  e  supernis  affulgens  tenebras  eius  aliquantum  discussit,  ubi  fortis  ille  regnum  eius  turbavit  ac  perculit,  tum  vero  solitum  suum  torporem  excutere  coepit,  et  arma  corripere.  Et  primum  quidem  hominum  manus  concitavit,  quibus  illucescentem  veritatem  violenter  opprimeret.  Per  quas  ubi  nihil  profectum  est,  ad  insidias  se  convertit,  dissidia  et  dogmatum  contentiones  per  Catabaptistas  suos  et  alia  nebulonum  portenta  excitavit,  quibus  eam  obscuraret,  tandem  et  exstingueret.  Et  nunc  utraque  machina  ipsam  tentare  perseverat.  Siquidem  et  verum  illud  semen  vi  ac  manu  hominum  evellere  conatur,  et  suis  zizaniis  (quantum  in  se  est)  nititur  occaecare,  ne  crescat  et  fructum  reddat.  Id  tamen  ipsum  frustra,  si  monitorem  Dominum  audimus,  qui  et  eius  artes  multo  ante  nobis  aperuit  ne  incautos  deprehenderet,  et  contra  omnes  eius  machinas  satis  firmis  praesidiis  armavit.  Caeterum,  in  ipsum  Dei  verbum  invidiam  conferre,  aut  seditionum,  quas  improbi  et  rebelles,  aut  sectarum,  quas  impostores  contra  excitant,  quanta  est  malignitas?  Novum  tamen  exemplum  non  est.  Interrogabatur  Elias  annon  is  esset  qui  turbabat  Israel?  Christus  seditiosus  Iudaeis  erat.  Apostolis  crimen  impingebatur  commotionis  popularis.  Quid  aliud  agunt  qui  hodie  omnes  turbas  ,  tumultus,  contentiones,  quae  in  nos  ebulliunt,  nobis  imputant?  Talibus  autem  quid  respondendum  sit,  docuit  nos  Elias,  nos  non  esse  qui  vel  errores  spargimus,  vel  tumultus  commovemus,  sed  eos  ipsos  qui  Dei  virtuti  obluctantur.  Verum  ut  illud  unum  ad  retundendam  eorum  temeritatem