41:259  259  PRAELECTIONES  260  exundabit.  Eadem  est  sententia  huius  loci,  nempe  etiam  si  multi  et  degenerent,  et  prorsus  desciscant  a  fide,  imo  fere  totus  populus,  tamen  ubi  stabunt  pauci  quidam,  hoc  est,  decem  ex  mille,  illos  fore  Dei  ministros,  ut  colligant  adhuc  novam  ecclesiam,  quoniam  sua  irrigatione  efficient,  ut  terra,  quae  prius  erat  sterilis,  producat  novum  aliquod  semen.  Docebunt  igitur  qui  erunt  intelligentes  in  populo  multos,  inquit.  Quanquam  autem  hic  praedicit  angelus  quod  futurum  erat,  hinc  tamen  colligere  admonitionem  oportet,  nempe  ut  quisque  nostrum  magis  profecit  in  fide,  ita  etiam  magis  obstringi  ad  studium  hoc  de  quo  loquitur  angelus,  nempe  ut  proximos  suos  magis  rudes  vel  imperitos  doceat.  Neque  enim  Deus  nobis  manum  porrigit,  ut  quisque  seorsum  sequatur,  sed  etiam  ut  alios  adiuvet,  et  studeat  secum  adducere.  Videmus  ergo  damnari  eorum  ignaviam,  quibus  Deus  plus  scientiae  et  fidei  contulit,  ubi  non  conferunt  in  fratrum  suorum  aedificationem  quod  apud  ipsos  deposuit.  Nam  haec  angeli  praedictio  instar  regis  et  regulae  valere  apud  nos  debet,  ut  scilicet  pro  modo  intelligentiae  suae  studeat  quisque  prodesse  fratribus  suis.  Adiungit  angelus  non  fore  hos  doctores  umbratiles,  qui  in  otio  praescribant  quid  agendum  sit,  et  disputent  sine  discrimine  et  sine  periculo,  vel  molestia  quid  sit  rectum,  quid  Deo  placeat,  sed  simul  fore  strenuos  bellatores.  Hic  ergo  coniungit  angelus  doctrinam  cum  fortitudine,  quae  superet  omnes  periculorum  metus  ac  terrores.  Hic  locus  hodie  nobis  plus  quam  utilis  est,  modo  discamus  expendere  quid  Deus  nobis  tradat  per  angelum  et  prophetam  suum.  Nam  in  summa  angelus  demonstrat  non  alios  probari  coram  Deo  doctores  pro  veris  et  legitimis,  nisi  qui  in  procinctu  asserunt  ipsam  doctrinam,  hoc  est,  qui  parati  sunt  suo  sanguine  eam  obsignare  quoties  opus  erit.  Haec  igitur  coniunctim  legenda  sunt,  quod  docebunt  Dei  cultum  multos  et  simul  cadent  in  gladio  et  flamma,  hoc  est,  etiam  si  cadendum  sit,  aut  pereundum  centies  vel  gladio,  vel  flamma,  ne  tamen  desistant  ab  officio  docendi.  Caeterum  hic  ponit  varias  species  mortis  angelus,  exhortationis  causa,  quia  si  tantum  dixisset  in  gladio,  non  expressisset  quod  utile  est  cognitu,  nempe  quos  Deus  praefecit  doctores  ecclesiae  suae  non  tantum  in  hoc  probari  in  munere  suo  exsequendo,  si  superent  unum  genus  tentationis,  sed  etiam  si  a  dextris  et  sinistris  sit  pugnandum,  ne  tamen  ideo  debilitent  varia  pericula  eorum  constantiam  et  fortitudinem.  Si  igitur  ab  una  parte  immineant  gladii,  deinde  si  ignes  accensi  sint,  si  direptio  bonorum,  si  exsilia  hinc  inde  minentur,  ut  nihilominus  pergant  doctores  in  cursu  suo.  Videmus  ergo  multiplices  conflictus  hic  numerari  ab  angelo,  ut  doceant  tantam  fore  gratiam  spiritus  in  fulciendis  doctoribus  et  magistris  ecclesiae,  ut  non  succumbant  ullis  tentationibus,