50:258  circumventi,  eos  durius  insectari  inhumanum  est.  Atqui  scimus  diabolum  semper  intentum  esse  insidiis  :  et  nos  mille  modis  ab  eo  circumveniri.  Quum  ergo  ex  fratribus  quempiam  videmus  lapsum,  cogitemus  in  Satanae  laqueos  incidisse:  ac  misericordia  tangamur  simusque  eo  ad  ignoscendum  propensiores.  Caeterum  non  dubium  est  quin  delicta  vel  lapsus  ab  intestinis  sceleribus  discernat,  quae  coniuncta  sunt  cum  deliberato  et  obstinato  Dei  contemptu.  Talis  nequitia  et  malitiosa  adversus  Deum  conspiratio  severius  excipienda  est.  Quis  enim  illic  lenitatis  profectus?  Particula  tamen,  quae  inseritur,  etiam,  tantundem  valet  ac  si  veniam  dari  iuberet  non  modo  infirmis  qui  tentati  fuerint,  sed  qui  tentationi  succubuerint.  Vos,  qui  spirituales.  Non  loquitur  ironice,  sed  utcunque  spirituales  sint,  non  tamen  penitus  spiritu  sunt  referti.  Talium  officium  est  erigere  lapsos.  Quorsum  enim  excellunt  nisi  in  fratrum  salutem?  nam  certe  quo  quisque  ampliore  gratia  praeditus  est,  eo  magis  obstrictus  est  minoribus,  ut  se  impendat  in  eorum  aedificationem.  Sed  quia  tam  sumus  praeposteri,  ut  etiam  in  optimis  officiis  erremus:  ideo  admonet  ne  quid  carnis  admisceant.  Considerans  te  ipsum.  Non  temere  numerum  mutavit.  Nam  efficacior  est  admonitio,  dum  sigillatim  unumquemque  appellat  iubetque  in  se  ipsum  descendere.  Tu  quisquis  es,  inquit,  qui  censorem  agis  in  alios,  te  quoque  respice.  Nihil  enim  difficilius  quam  nos  adducere  ad  propriae  infirmitatis  recognitionem  vel  examen.  Quum  simus  in  notandis  aliorum  vitiis  plus  quam  acuti:  quod  ad  nostra,  non  videmus  manticae  quod  in  tergo  est,  ut  inquit  ille.  Itaque  quo  acrius  stimulet,  singulari  numero  utitur.  Duplex  autem  potest  esse  sensus.  Nam  quum  agnoscimus  nos  peccatis  obnoxios,  veniam,  quam  volumus  nobis  dari,  vicissim  libentius  aliis  damus.  Ideo  quidam  sic  accipiunt  Pauli  verba,  ne  immitem  vel  inexorabilem  aliis  te  praebeas,  qui  peccator  ipse  es,  et  fratrum  misericordia  eges.  Mihi  tamen  altera  expositio  non  minus  placet:  ut  Paulus  cavere  praecipiat  ne  alios  corrigendo  ipsi  peccemus.  Est  enim  periculum  quod  summopere  cavendum  est,  et  difficulter  tamen  cavetur:  quia  nihil  proclivius  quam  modum  excedere.  Quamquam  nihil  obstat  quominus  tentationem  accipias  in  praesenti  causa  et  ad  totam  vitam  extendas.  Meminerimus  ergo  a  nobis  incipere,  quoties  agenda  est  de  vitiis  censura:  ut  infirmitatis  nostrae  memores,  erga  alios  simus  moderati.  2.  Alii  aliorum  onera  portate.  Valde  apposita  est  loquutio  ad  humanitatis  commendationem,  quum  infirmitates  vel  vitia,  quibus  laboramus,  vocat  onera.  Natura  enim  hoc  dictat,  sublevandos  esse  qui  oneri  succumbunt.  Portare  autem  onera  iubet,  non  ut  indulgentia  aut  dissimulatione  foveamus  mala  quibus  17