41:258  scelerum  suorum  implicationem  stultum  vulgus,  ut  hodie  videmus  in  papatu  corruptum  esse  totum  mundum  a  sacrificis.  Tunc  igitur  sacerdotes  tendebant  laqueos  plebi,  ut  omnes  fere  secum  abstraherent  in  eandem  impietatem.  At  vero  hic  angelus  dicit  fore  tamen  aliquos  in  populo  intelligentes.  Quanquam  non  praecise  restringo  hoc  ad  sacerdotes,  sed  tamen  non  dubito  quin  angelus  ab  ipsis  incipiat.  Erat  exigua  portio  eorum,  qui  vere  docerent,  sicuti  has  partes  iniunxerat  illis  Deus,  sed  tamen  angelus  praedicit  fore  aliquos  residuos.  Tamen  postea  secundo  loco  comprehendit  etiam  alios,  qui  vere  erant  edocti  in  lege  Dei:  et  quamvis  non  obstringeret  eos  sacerdotii  necessitas,  tamen  studebant  revocare  in  viam  salutis  errantes.  Dicit  igitur,  Quicunque  erunt  periti  docebunt  multos,  inquit.  Caeterum  hoc  etiam  loco  subest  obliqua  antithesis  inter  probos  Dei  servos  et  illos  fictitios  doctores,  qui  titulis  superbiebant,  quemadmodum  hodie  cernimus  idem  exemplum  in  papatu.  Nam  insolenter  exsultant  tam  episcopi  quam  cardinales,  deinde  abbates  et  quisquiliae  illae,  ac  obstupefaciunt  miserum  vulgus.  Quid?  Nos  sumus  repraesentativa  ecclesia,  et  penes  nos  est  iudicium  et  interpretatio  legis  et  scripturae.  Quemadmodum  ergo  hodie  nebulones  illi  sibi  arrogant  quidquid  est  scientiae,  et  volunt  etiam  censeri  angelis  aequales,  ita  scimus  fuisse  factum  in  veteri  populo.  Propheta  autem  hic  subsannat  stolidam  illam  confidentiam,  ac  dicit,  Qui  intelligentes  erunt  in  populo,  hoc  est,  qui  vere  sapient,  quasi  diceret  existimationem  illos  larvatos  praesules  sibi  acquirere,  sed  sine  ratione  ulla:  coram  Deo  autem  reputari  demum  intelligentes,  qui  manent  in  pura  legis  doctrina:  deinde  qui  colunt  simpliciter  pietatem,  et  absque  ullo  fuco.  Ergo  tales  vocat  intelligentes  populi.  Iterum  repetit  nomen  populi,  et  eodem  sensu,  quasi  diceret,  non  omnes  qui  sibi  nomen  usurpant  coram  Deo,  esse  veros  Israelitas,  sed  requiri  simul  veram  scientiam.  Qualis  autem  illa  sit  scientia  vel  prudentia  ex  proximo  versu  facile  colligitur.  Nam  vanitas  est  quidquid  scire  se  homines  existimant  absque  notitia  Dei.  Illi  ergo  docebunt  multos.  Angelus  porro  hic  non  tantum  praedicit  fore  aliquos  in  populo,  qui  maneant  constantes  inter  graves  illos  insultus,  et  consistant  firmi  in  fide,  sed  dicit  etiam  aliis  fore  rectores,  quasi  diceret,  Deum  suis  electis  daturum,  ut  non  modo  quisque  fortiter  resistat,  et  sese  conservet  purum  et  impollutum  contra  omnes  corruptelas,  sed  simul  eos  qui  tales  erunt,  aliis  fore  adiutores,  ne  scilicet  declinent,  vel  si  declinaverint,  ut  reducant  eos  in  viam.  Denique  hic  significat  angelus,  quamlibet  exiguum  semen  Deus  conservet  in  ecclesia  sua,  tamen  fore  paucos  aliis  doctores  et  magistros,  quemadmodum  dicit  Isaias  cap.  10  (v.  22).  Deus  consumet,  inquit,  populum  suum:  sed  consumptio  illa  aliquid  residuum  habebit,  et  deinde  17