29:258  dum  ne  sic  cum  proximis  versemur,  ut  sine  causa  vel  iniuria  lacessitus  ipsi  Deo  bellum  intulisse  videamur.  Anna  vero  sic  lacessita  flevisse,  et  indoluisse,  ac  cibum  non  sumsisse  hic  dicitur.  Qua  in  re  aliquid  humani  passam  apparet.  Neque  id  mirum:  sic  enim  fere  fit  ut  bona  indole  praediti  contumeliis  et  vituperio  maxime  afficiantur.  Virum  fortem  et  magnanimum  facile  illatam  corpori  iniuriam  ferre  videmus,  vehementer  autem  contumeliis,  cum  vituperio  ac  dedecore  coniunctis,  affici.  Verumtamen  etsi  hoc  humanum  est,  non  tamen  coram  Deo  culpa  vacuum.  Et  quid  suo  fastu  Peninna  efficiat?  Quare  nostris  passionibus  modum  adhibere  discamus:  ac  si  nos  mortales  despectui  habent,  Dei  favore  et  benevolentia  nos  consolemur,  et  quascunque  illatas  iniurias  patienter  in  Deum  nostri  curam  reiicientes  feramus.  Quis  vero  doloris  ac  lacrymarum  Annae  fuerit  deinceps  exitus,  videamus,  nempe  ad  Deum  supplex  facta  dicitur.  Iniuriam  iniuria  pellere  non  nititur,  quod  sibi  multi  licere  putant:  non  meditatur  adversus  Peninnam  dolos,  sed  lacrymabunda  se  ad  Dei  sanctuarium,  tutum  asylum,  confert.  Hinc  discamus  ut  si,  quandoquidem  homines  sumus,  non  possumus  non  affici  iniuriis  quin  humanum  aliquid  patiamur,  remedium  optimum  esse  si  iracundiam  compescamus,  ne  maiores  irae  aut  simultates  surgant.  Nam  plerumque  hoc  accidit  ut  animi  paulatim  ira  et  odio  inflammati,  tandem  implacabiles  et  inexpiabiles  fiant.  Nam  qui  ludibrio  se  haberi  conspexerit,  dum  iracundiae  suae  vicissim  obtemperat,  et  animi  impotens  quidquid  ira  suggesserit  evomuerit,  fit  ut  irae  crescant,  et  in  utrumque  Satan  dominetur,  ut  in  dies  ad  priores  iniurias  aliae  accedant,  et  iurgia  iurgiis  cumulentur.  Hinc  privatam  sibi  quisque  vindictam  permissam  arbitratur,  malumque  malo  repellere.  Quod  quid  tandem  aliud  est  quam  ipsi  diabolo  sacrificare?  Non  sic  Anna:  nam  etsi  dolore  aliquo  tangitur,  et  illatis  contumeliis  afficitur,  tamen  ad  lacrymas  potius  quam  ad  vim  confugit.  Quare  maritum  ipsius  modestiam  observasse  verisimile  est,  ac  proinde  ad  partes  ipsius  adversus  alteram  tutandas  factum  procliviorem.  Hinc  observandum,  longe  conducibilius  esse  nobis  illatas  iniurias  ferre  quam  ulcisci:  quod  eorum  nobis  favorem  conciliemus,  quibus  alioquin  iniquioribus  uteremur.  Si  Anna  contumelias  contumeliis  propulsasset,  verisimile  estElcanam  in  alteram  partem  magis  proclivem  futurum,  et  tanquam  sibi  illatam  iniuriam  vindicaturum.  At  quum  eam  silentio  prementem  iniurias,  et  lacrymis  sese  ac  sui  contemptum  vindicantem  videt,  in  eius  causam  propensior,  verbis  etiam  amicis  eam  solatur:  Etsi  non  omni  hac  in  parte  culpa  eximendus  videtur  Nam  quum  in  arrogantem  feminam  autoritatem  haberet,  an  non  eam  severioribus  verbis  increpare  debuit:  17