52:256  ducerentur,  instruere  se  potius  illius  armis  debuissent  ad  gerendum  cum  sceleribus  et  maleficiis  bellum,  quam  eius  colorem  suae  ambitioni  et  ineptae  garrulitati  praetexere.  Iniustis  et  inobsequentibus.l)  Pro  iniustis  melius  vertere  interpretes  poterant  exleges  :  nam  graece  habetur  avo|Aooc,  a  quibus  parum  differunt  inobsequentes,  quos  secundo  loco  posuit.  Peccatores  accipit  pro  sceleratis,  aut  qui  vitae  sunt  turpis  ac  flagitiosae.  Pro  irreligiosis2)  et  profanis  non  absurde  quis  transferret  profanos  et  impuros:  sed  ego  in  vocibus  levis  momenti  nolui  esse  tam  morosus.  Plagium  apud  veteres  alieni  servi  subreptio  aut  sollicitatio  vocabatur,  aut  falsa  liberi  hominis  venditio.  Si  quis  plura  requirat,  petat  a  iureconsultis,  ad  legem  Flaviam.  Caeterum  genera  quaedam  attingit  hic  Paulus,  quae  breviter  omnes  transgressiones  comprehendunt.  Radix  est  contumacia  et  rebellio,  quam  primis  duobus  vocabulis  notavit.  Per  impios  et  peccatores,  videntur  prioris  et  secundae  tabulae  transgressores  designari.  His  subiicit  profanos  et  impuros,  vel  turpi  vita  inquinatos.  Quum  autem  tribus  praecipue  modis  laedantur  proximi,  violentia,  fraudibus  et  libidine,  tres  istos  modos  ordine  taxavit,  ut  promptum  est  videre.  Violentia  enim  est  in  homicidis  et  parentum  percussoribus  :  secundo  foedae  libidines  notantur:  tertio  ad  fraudes  aliaque  maleficia  descendit.  10.  Si  quid  est  aliud.  Hoc  membro  contendit,  adeo  non  pugnare  suum  evangelium  cum  lege,  ut  sit  optima  eius  confirmatio.  Testatur  enim  se  comprobare  sua  praedicatione  eandem  sententiam,  quam  Dominus  lege  sua  tulit  adversus  ea  omnia  quae  sanae  doctrinae  contraria  sunt.  Unde  sequitur,  eos  legis  animam  minime  tenere,  qui  ab  evangelio  recedunt,  sed  umbram  duntaxat  sectari.  Sana  doctrina  frigidis  quaestionibus  opponitur,  circa  quas  alibi  praeposteros  doctores  languere  dicit,  quae  ab  effectu  merito  morbidae  censentur.  Evangelium  gloriae,  pro  glorioso.  In  quo  tamen  acriter  eos  perstringit  qui  extenuando  evangelio  imminebant,  in  quo  Deus  suam  gloriam  exserit.  Nominatim  addit  sibi  fuisse  creditum,  ut  omnes  intelligant  non  aliud  esse  Dei  evangelium,  quam  quod  praedicat:  ideoque  fabulas  omnes,  quas  prius  reprehendit,  alienas  esse  tam  a  lege  quam  ab  evangelio  Dei.  12.  Et  gratiam  habeo,  qui  me  potentem  reddidit,  Christo  Iesu  domino  nostro,  quod  fidelem  me  iudicavit,  ponendo  in  ministerium,  13.  qui  prius  eram  blasphemus,  et  persequutor,  et  violentus.  Sed  et  misericordiam  adeptus  sum,  quod  ignorans  feci  in  incredulitate.  O  Iniustos  vocat  exleges.  2)  irreverentibus