41:256  perniciem  nostram.  Ergo  diligenter  expendere  convenit  hunc  locum,  et  assidue  meditari,  ubi  dicit  propheta,  Quamvis  apostatae  blanditiis  decepti  cultum  Dei  repudient,  prodant  ecclesiam  et  pietatem  abnegent,  tamen  staturos  in  fide  omnes  pios.  Non  est  igitur  quod  quisquam  obtendat  exempla  levitatis,  quo  suam  culpam  tegat,  si  imitetur  homines  perfidos  et  duplices,  vel  hypocritas,  quoniam  hic  nobis  depingit  angelus  ecclesiae  imaginem  quum  dicit  multos  quidem  fore  defectores,  sed  tamen  eorum  levitatem  et  inconstantiam,  imo  perfidiam  non  fore  obstaculo  filiis  Dei,  quominus  prosequantur  fidei  et  pietatis  suae  cursum.  Sed  notandum  etiam  est  epitheton  quo  pios  ornat,  quum  dicit,  populus  cognoscens  Deum  suum.  Posset  nomen  populi  trahi  ad  ipsum  vulgus,  sed  illud  esset  coactum.  Posset  etiam  simpliciter  opponi  profanis  gentibus:  sed  puto  hic  subesse  obliquam  antithesin  inter  veros  et  genuinos  Abrahae  filios,  et  inter  falsos  Israelitas,  qui  sese  iactabant  esse  membra  ecclesiae,  quum  tamen  nihil  haberent  praeter  inanem  titulum.  Nam  apud  prophetas,  sicuti  apud  Mosen  nomen  populi  saepe  accipitur  in  bonam  partem,  pro  gente  illa  electa,  quam  Deus  scilicet  adoptaverat  in  peculium.  Israelitae  omnes  qui  ex  Abraham  erant  progeniti  secundum  carnem,  plenis  buccis  gloriabantur  se  esse  populum  electum,  semper  nomen  populi  illis  erat  in  ore.  Hic  autem  propheta  perstringit  stultam  iactantiam  eorum  qui  solebant  ita  praetexere  Dei  nomen,  quum  tamen  nihil  in  ipsis  solidum  esset.  Ergo  populus  qui  cognoscent  Deum  suum,  hoc  est,  populus  Dei,  sese  roborabit,  sed  per  correctionis  speciem  adiungit,  qui  cognoscent  Deum,  quemadmodum  Psalmo  septuagesimo  tertio  (v.  1),  Quam  bonus  Israeli  Deus  his  qui  recto  sunt  corde.  Restringit  illic  propheta  nomen  Israelis  ad  electos  Abrahae  filios,  nempe  qui  pietatem  serio  et  ex  animo  colebant,  quoniam  illud  in  consuetudinem  venerat,  secure  Dei  nomine  abuti.  Sic  ergo  nunc,  Populus  qui  cognoscent  Deum  suum,  qui  etiam  iidem  sunt  verus  populus,  hoc  est,  quos  Deus  agnoscit  pro  suo  electo  populo.  Discernit  hoc  modo  angelus  inter  carnales  filios  Abrahae,  et  inter  pios  Dei  cultores.  Iam  hoc  etiam  observatu  dignum  est,  dum  causam  et  quasi  fundamentum  constantiae  assignat  angelus  in  cognitione  Dei.  Quomodo  igitur  fiet,  ut  sint  aliqui  residui,  ubi  apostatae  sese  ita  prostituerint?  Nempe  quia  cognitio  Dei  praevalebit,  ut  superent  hos  insultus,  vel  fortiter  repellant,  neque  succumbant  ullis  tentationibus.  Videmus  ergo  ubi  posita  sit  nostra  fortitudo,  nempe  in  Dei  cognitione.  Cognitio  autem  hic  non  tantundem  valet  ac  frigida  imaginatio,  sed  accipitur  pro  fide  quae  radicem  vivam  egit  in  cordibus.  Hinc  sequitur,  non  cognosci  vere  Deum  a  nobis,  nisi  ubi  fortiter  pugnamus  dum  ad  experimenta  veniendum  est,  et  manemus  firmi