52:255  255  EPIST.  PAULI  AD  TIMOTHEUM  L  256  praeoccupat,  qua  ipsum  gravabant.  Nam  quoties  eorum  ostentationi  resistebat,  hoc  quasi  clypeo  se  tuebantur,  Quid  ergo?  visne  sepultam  esse  legem,  et  deletam  ex  hominum  memoria?  Fatetur  ergo  Paulus,  ut  hac  calumnia  eos  depellat,  bonam  esse  legem,  sed  usum  eius  legitimum  requiri:  ubi  argumentatur  a  coniugatis:  nomen  enim  legitimi  ab  ipsa  lege  deductum  est.  Verum  ultra  progreditur:  nam  et  legem  pulchre  cum  sua  doctrina  convenire  docet,  et  eandem  in  ipsos  retorquet.  9.  Quod  iusto  non  sit  lex.  Non  instituit  apostolus  disputare  de  toto  legis  officio:  sed  homines  ipsos  respicit.  Fere  enim  contingit  ut  qui  summi  legis  zelotae  videri  affectant,  tota  vita  se  prodant  summos  esse  contemptores.  Cuius  rei  praeclarum  hodie  specimen  relucet  in  assertoribus  iustitiae  operum,  et  liberi  arbitrii  patronis.  Perpetuo  in  ore  habent  persectam  vitae  sanctitatem,  merita,  satisfactiones:  tota  autem  vita  clamitat,  eos  plusquam  impios  et  profanos  esse,  provocare  quibuscunque  modis  iram  Dei,  et  iudicium  eius  secure  contemnere.  Magnifice  extollunt  liberam  boni  et  mali  electionem:  factis  autem  produnt  se  esse  Satanae  mancipia,  et  quidem  arctissimis  servitutis  compedibus  districta.  Quum  tales  essent  Pauli  adversarii,  ut  stolidam  eorum  insolentiam  compesceret,  admonuit  legem  esse  quasi  Dei  gladium  ad  ipsos  iugulandos  exsertum:  sibi  vero  suique  similibus  non  esse  causam  cur  legem  horrori  vel  odio  haberent,  quae  iustis,  hoc  est,  piis  et  voluntariis  Dei  cultoribus  non  sit  adversa.  Nec  me  latet,  doctos  quosdam  viros  subtiliorem  ex  his  verbis  sensum  elicere  :  quasi  penitus  theologice  de  legis  natura  disputaret  Paulus.  Colligunt  enim,  legem  nihil  ad  filios  Dei,  qui  spiritu  sunt  regenerati,  pertinere:  quia  iustis  non  sit  lata.  Sed  loci  circumstantia  simplicius  me  accipere  cogit  hanc  sententiam.  Sumit  enim  vulgare  illud  principium,  ex  malis  moribus  natas  esse  bonas  leges:  ac  legem  Dei  asserit  latam  esse  ad  coercendam  impiorum  nequitiam:  quia  qui  sponte  boni  sunt,  legis  imperio  non  indigent.  Nunc  quaeritur  an  unus  quispiam  mortalium  eximatur  ab  hoc  numero.  Respondeo,  Paulum  hic  nominare  iustos,  non  qui  sint  omnibus  numeris  absoluti  (qualis  nemo  reperietur)  sed  qui  praecipuo  cordis  affectu  ad  bonum  adspirant:  ut  illis  pium  desiderium  sit  quasi  lex  voluntaria,  absque  alieno  impulsu  aut  fraeno.  Ergo  adversariorum  impudentiam  coarguere  voluit,  qui  legis  nomine  se  armabant  adversus  pios  viros,  veram  legis  regulam  tota  vita  exprimentes:  quum  ipsi  maxime  opus  haberent  lege,  et  tamen  eam  non  magnopere  curarent.  Quod  melius  opposito  membro  exprimitur.  Quod  si  quis  non  admittat,  tacite  vel  oblique  exprobrari  adversariis  quae  hic  flagitia  recenset  Paulus,  simplex  tamen  manebit  calumniae  depulsio:  quod  si  recto  et  non  fucato  legis  studio