41:254  templo,  ut  pii  agnoscant  Deum  non  cessisse  violentiae  tyranni,  sed  stare  integram  et  illibatam  eius  virtutem,  quamvis  templum  expositum  esset  tam  foedis  ludibriis.  Denique  voluit  fideles  retinere  in  hac  doctrina,  invictam  esse  Dei  potentiam,  qui  sibi  templum  illud  elegerat  instar  domicilii,  quamvis  ad  tempus  ita  insolesceret  Antiochus,  et  templum  una  cum  impiis  profanaret:  perinde  ac  si  iuberet  pios  oculis  fidei  respicere  in  potentiam  Dei,  quae  tunc  erat  abscondita,  et  quam  impii  pro  sua  superbia  pedibus  calcabant.  Fuit  sane  illud  spectaculum  plus  quam  triste  quum  statua  erecta  esset  in  templo.  Deus  enim,  quemadmodum  dictum  fuit,  promiserat  se  fore  tutorem  illius  montis  sacri.  Quum  ergo  ita  impii  proterve  insultarent,  quis  non  putasset  Deum  esse  victum,  nec  posse  amplius  locum  suum  tueri?  Ergo  hic  angelus  iubet  fideles  aliud  statuere  cum  animis  suis,  quam  oculis  adspiciant,  nempe  sanctuarium  quod  tunc  erat  debile,  et  quod  exutum  erat  omni  suo  praesidio,  tamen  esse  sanctuarium  virtutis,  idque  Dei  respectu.  Postea  adiungit,  Et  abolebunt  iuge  sacrificium:  quod  etiam  factum  est:  sed  breviter  haec  singula  perstringo,  quoniam  tandem  licebit  tempestive  summam  colligere.  Et  ponent,  vel  statuent,  illam  abominationem  quae  obstupescere  faciet*  Nam  quis  non  fuisset  attonitus  quum  videret  templum  derelictum  esse  a  Deo?  Nam  si  Deo  curae  erat  religio  illius  templi,  cur  non  obstitit  tanto  furori?  Cur  passus  est  se  ipsum  affici  tam  indigna  contumelia?  Ergo  his  tentationibus  angelus  occurrit,  et  dicit,  etiam  si  obstupefiant  optimi  quique  tanto  probro,  tamen  nihil  fortuito  contingere.  Nam  Deus  iam  haec  omnia  praeviderat,  et  decreverat  etiam.  Neque  enim  praedicta  fuerunt,  nisi  quia  voluit  Deus  probare  suorum  fidem,  deinde  poenam  exigere  de  ingratitudine  populi.  Sed  non  possem  hodie  absolvere.  Diximus  postrema  lectione  quam  serio  examine  probaverit  Deus  suorum  fidem,  quum  tantum  licentiae  permisit  Antiocho  ut  templum  pollueret,  et  ad  tempus  aboleret  sacrificia  et  totum  cultum:  deinde  statueret  abominationem  in  medio  templo,  quae  stupore  deiiceret  omnes  pios,  quoniam  prodigium  illud  non  poterat  conspici  quin  omnes  attoniti  essent,  quia  nemo  putasset  fieri  posse,  ut  Deus  tanto  probro  exponeret  sanctuarium  suum,  quod  unum  in  toto  orbe  elegerat.  Nunc  sequitur,  Et  transgressores  foederis  decipiet  blanditiis,  verum  populus  cognoscentes  Deum  suum  roborabit  se  et  faciet.  Hic  clarius  exprimit  Daniel  quod  prius  dixerat  de  corruptela  cultus  Dei,  adeoque  eversione,  nempe  quoniam  Antiochus  blande  ad  se  alliciet  homines  perfidos,  qui  tamen  erunt  ex  populo  Dei,  titulo  tenus  scilicet.  Atqui  ita  repetit  quod  prius  vidimus.  Fuerunt  enim  hypocritae  quasi  brachia  Antiochi,  quia  etiam  si  vi