29:254  necessitudo  coram  Deo  apparentes  oportuit  pacem  colere,  quanto  magis  eos  qui  una  familia  continebantur  id  decuit?  Quid  igitur  istis  mulieribus  faciendum  arbitramur,  quarum  unus  erat  maritus?  Nonne  depositis  odiis  et  simultatibus  ad  Deum  illas  opportebat  accedere,  tanquam  unius  corporis  membra?  Verum  procul  absunt  ab  hac  cogitatione:  nam  neque  de  Dei  gloria  cogitant,  neque  de  eiusmodi  protestatione:  sed  potius  in  simultates  intentae  cum  contemptu  a  Deo  institutum  ordinem  evertunt.  Nam  interim  Peninna  prosequitur  Annam  odio,  et  simultatibus  superbe  indulget.  Hinc  eorum  impietas  apparet,  qui  Dei  cultum  verbis  dum  simulant,  ex  eo  male  faciendi  occasionem  arripiunt.  Qui  Deo  sacrificabant  testari  palam  ac  profiteri  videbantur  velle  se  suosque  omnes  Deum  ex  animo  colere.  En  tamen  Penninam,  alteram  Elcanae  uxorum,  de  sacrificiorum  portione  gloriabundam  et  ad  iurgiorum  occasionem  abutentem,  Deoque  veluti  aperte  illudentem.  Hic  porro  notandum,  tunc  temporis  Dei  populum  ad  sanctuarium  et  oratum  et  sacrificatum  venisse,  ut  certior  de  exauditione  precum  fieret.  Nam  etsi  fideles  singulos  domi  fieri  Deo  supplices  cum  certa  fiducia  exauditionis  oportuit,  tamen  peculiare  testimonium  suae  praesentiae  Deus  in  sanctuario  praebere  voluit,  ut  in  eius  veluti  conspectum  venientes,  magis  ac  magis  de  divino  erga  se  favore  et  benevolentia  confirmarentur.  Precibus  vero  nihil  magis  repugnans  quam  discordiae,  odia  et  simultates.  Nam  obsecro,  quomodo  manus  supplices  ad  Deum  tendas,  quibus  tecum  supplicanti  velis  oculos  effodere?  Qualis  quantaque  mortalium  perversitas?  Ad  Deum  accedere  concordiam  simulantes  ac  prae  se  ferentes,  qui  tamen  corde  simultates  et  odia  premunt?  Annon  istud  est  nimis  impudenter  Deo  mentiri?  Quare  Deum  precari  et  odia  cum  fratribus  exercere  omnino  contraria  sunt.  Deus  enim  preces  veluti  tesseram  mutuae  nostrae  cum  fratribus  coniunctionis  esse  vult.  Nec  precantes  propriam  tantum  causam  agere,  sed  etiam  proximorum  commoda  et  salutem  procurare  iubet,  ac  singulari  cura  et  sollicitudine  ecclesiae  totius  salutem  exposcere.  Sic  Christum,  precari  suos  docentem,  verba  ista  praescripsisse  videmus.  Nam  nemo  privatim  panem  suum  quotidianum  sed  toti  ecclesiae  petere  docetur,  quum  his  verbis  dicimus:  Da  nobis  hodie  panem  nostrum  quotidianum,  Remitte  nobis  debita  nostra.  Magnae  ergo  divini  nominis  profanationis  rea  est  Peninna  Annam  provocans  et  irritans,  eoque  maior  et  indignior  eius  petulantia,  quod  sociam  lecti,  quo  quietior  et  pacatior  est,  eo  magis  tamen  lacessit  ac  provocat.  Nae  inhumana  Peninna  fuit,  quae  superbiae  suae  laxans  habenas  in  eam  a  qua  laesa  non  fuerat  adeo  procax  fuit.  At  quae  causa  tantarum  simultatum?  Nempe  quaedam  maior  beneficentiae  Dei  erga  Phe-