8:253  253-254  CLARISSIMIS  VIRIS  ET  MAGNIFICIS  SUIS  DOMINIS,  SYNDICIS  SENATUIQUE  GENEVENSI,  ECCLESIAE  PASTORES,  QUIBUS  VERBI  ADMINISTRATIO  TUM  IN  URBE  TUM  IN  AGRO  MANDATA  EST,  IUSTAM  SANCTAMQUE  REIPUBLICAE  ADMINISTRATIONEM  ET  FELICEM  SUCCESSUM  PRECANTUR.  Quae  nos  ad  libellum  hunc  scribendum  impulit  ratio,  eadem  ad  ipsum  vobis  nuncupandum  hortatur,  praestantissimi  Domini,  ut  sub  nomine  vestro  auspiciisque  exeat.  Electio  Dei  gratuita,  qua  sibi  ex  perdito  damnatoque  hominum  genere  quos  visum  est  adoptat,  hactenus  non  minus  reverenter  et  sobrie,  quam  sincere  et  absque  fuco  hic  tradita  a  nobis,  et  placide  a  populo  recepta  fuerat:  donec  circumforaneum  erronem  nuper  supposuit  turbarum  omnium  pater  Satan,  qui  et  doctrinam  nostram,  quae  ex  puro  Dei  verbo  sumpta  est,  convellere,  et  fidem  totius  populi  labefactare  tentaret.  Sed  quia  vel  ex  incenso  Dei  templo  voluit  famelicus  gloriolae  captator  innotescere,  ne  [pag.  4]  sacrilegae  audaciae  praemium  quod  aucupatus  est  reportet,  nomen  eius  silentio  nostro  sepultum  maneat  Caeterum,  quando  molestia,  quam  nobis  exhibere  conatus  est,  non  minus  vobis  communis  fuit,  fructum  inde  aliquem  ad  vos  pervenire  aequum  est.  Et  quemadmodum  vos  experti  sumus  strenuos  cordatosque  piae  causae  vindices,  ita  nostrarum  partium  esse  duximus,  quam  possemus  gratitudinem  vicissim  testari.  Eadem  etiam  opera,  quale  vestro  patrocinio  tutati  sitis  doctrinae  genus,  palam  constabit.  Etsi  enim  neque  generosos  'Reipublicae  praesides,  neque  Christi  ministros  anxie  a  rumoribus  pendere  decet:  quin  potius  sinistrae  multae  obtrectationes,  quae  sua  raucedine  fractae  paulatim  concidunt,  utrisque  fortiter  altoque  animo  spernendae  sunt:  magnopere  tamen  refert,  quasi  publicis  tabulis  consignatam  sub  oculis  et  inter  manus  hominum  exstare  rei  summam,  quae  falsas  aut  stultorum,  aut  levium,  aut  improborum  voces  coarguat,  et  simul  compescat  frivolos  vulgi  susurros.  Sparsus  multis  in  locis  fuit  rumor,  duris  eum  vinculis  constringi,  quum  per  medium  forum  quotidie  volitare  licuerit.  Quam  maligne  etiam  finxerint  virulenti  quidam  homines,  ad  capitis  supplicium  a  nobis  eum  exposci  Lpag.  5],  vos  nobis  optimi  estis  testes.  Tales  calumnias,  donec  evanescant,  contemptu  et  tranquilla  animi  magnitudine  refutare,  gravitatis  et  prudentiae  est.  Rursum  tamen,  ne  incerti  plerique  fluctuentur,  quorum  habenda  est  ratio:  statum  causae  omnibus  esse  expositum,  non  minus  expedit,  quam  ex  officio  nostro  est.  Serpit  instar  gangrenae  impietas,  inquit  Paulus,  nisi  obviam  eatur.  Ista  autem,  quam  sub  vestro  nomine  piis  omnibus  offerimus,  defensio,  tam  erit  ad  curandos  sanabiles,  ut  quidem  speramus,  validum  efficaxque  remedium,  quam  salubre  antidotum  sanis  et  integris.  Ac  digna  est  materia,  ad  quam  studia  sua  intendant  filii  Dei,  ne  coelestis  suae  geniturae  originem  ignorent.  Stulte  enim  quidam,  quia  evangelium  potentia  Dei  vocatur  in  salutem  omni  credenti,  hoc  praetextu  Dei  electionem  obliterant.  Atqui  venire  illis  in  mentem  debuerat,  unde  oriatur  fides.  Passim  autem  scriptura  clamat,  Deum  filio  suo  dare  qui  sui  erant,  vocare  quos  elegit,  et  quos  sibi  adoptavit  in  filios,  spiritu  suo  regignere:  credere  denique  homines  quos  ipse  intus  docuit,  et  quibus  patefactum  est  eius  brachium.  Porro  quisquis  fidem  arram  esse  et  pignus  tenebit  adoptionis  gratuitae,  ex  aeterno  divinae  electionis  [pag.  6]  fonte  manare  fatebitur.  Neque  tamen  ex  arcano  Dei  consilio  petenda  nobis  est  salutis  notitia.  Vita  in  Christo  proposita  est,  qui  se  in  evangelio  non  modo  patefacit,  sed  fruendum  exhibet.  In  hoc  speculum  defixus  sit  fidei  aspectus:  nec  penetrare  appetat  quo  accessus  non  patet.  Quando  haec  via  est,  in  ea  ambulent  filii  Dei,  ne  altius  quam  fas  est  evolando,  in  profundiorem,  quam  optandum  sit,  labyrinthum  se  demergant  Caeterum,  ut  non  alia  est  coelestis  regni  ianua