52:253  253  CAPUT  I.  254  evangelium  gloriae  beati  Dei,  quod  concreditum  est  mihi.  Quoniam  nebulones  illi,  quibuscum  negotium  habebat  Timotheus,  legis  praetextu  se  iactabant:  ideo  anticipat  Paulus,  ac  docet  legem  non  modo  illis  nihil  suffragari,  sed  potius  esse  adversam  :  cum  evangelio  autem,  quod  ipse  docuerat,  optime  convenire.  Neque  enim  absimilis  erat  illorum  defensio  ei,  quam  hodie  nobis  quaestionarii  opponunt:  nos  scilicet  nihil  moliri  aliud  quam  ut  aboleatur  sacra  theologia:  quasi  eam  soli  in  sinu  suo  foverent.  Ita  illi  de  lege  loquebantur  ut  invidiam  Paulo  conflarent.  Quid  autem  ille?  Quo  fumos  illos  discutiat,  ultro  per  occupationem  suam  doctrinam  optime  cum  lege  congruere  demonstrat:  et  eos  omnes  perperam  lege  abuti  qui  in  alium  finem  ea  utuntur.  Quemadmodum  hodie,  posita  verae  theologiae  definitione,  palam  apparet,  nos  cupere  ipsam  restitutam,  quae  misere  lacerata  et  deformata  fuit  ab  istis  nugatoribus,  qui  theologorum  titulo  frustra  inflati  nihil  praeter  dilutas  ac  frigidas  nugas  tenent.  Praeceptum  hic  pro  lege  accepit,  partem  pro  toto.  5.  Caritas  ex  puro  corde.  Ad  hunc  scopum  si  lex  dirigenda  est  ut  instituamur  in  caritate,  quae  ex  fide  et  bona  conscientia  procedat:  sequitur  ex  adverso,  perversos  esse  legis  interpretes  qui  ad  curiosas  quaestiones  eius  doctrinam  convertunt.  Caeterum  non  magni  interest,  caritatem  hoc  loco  ad  utramque  legis  tabulam,  an  ad  secundam  tantum  referas.  Iubemur  Deum  ex  toto  corde  diligere,  et  proximos  ut  nosmetipsos.  Sed  quum  de  caritate  fit  mentio  in  scriptura,  saepius  ad  secundum  membrum  restringitur.  Hic  quidem  non  dubitarem  Dei  et  proximi  caritatem  intelligere,  si  solum  caritatis  nomen  positum  esset  a  Paulo.  Sed  quum  addat  fidem,  et  bonam  conscientiam,  et  cor  purum:  non  erit  haec,  quam  subiiciam,  interpretatio  aliena  ab  eius  mente,  et  circumstantiae  loci  apte  quadrabit.  Haec  legis  summa  est,  ut  Deum  colamus  sincera  fide,  et  pura  conscientia:  deinde  ut  nos  mutuo  amemus.  Quisquis  hinc  deflectit,  ille  depravat  legem  Dei,  in  alienum  finem  detorquendo.  Sed  hic  exoritur  dubitatio,  quod  caritatem  fidei  praeferre  videtur  Paulus.  Respondeo,  eos,  qui  ita  sentiunt,  nimis  pueriliter  ratiocinari.  Neque  enim  si  caritas  priore  loco  nominatur,  ideo  priorem  habet  honoris  gradum:  quandoquidem  simul  docet  Paulus,  ex  fide  eam  manare.  Causa  antem  effectum  suum  profecto  ordine  antecedit.  Et  si  rite  expendatur  totus  contextus,  perinde  valet  quod  Paulus  dicit  ac  si  dixisset,  hoc  consilio  data  nobis  est  lex  ut  in  fide  nos  erudiret,  quae  mater  est  bonae  conscientiae  et  caritatis.  Ita  exordium  a  fide,  non  a  caritate  fieri  debet.  Cor  purum  et  bona  conscientia  parum  inter  se  differunt.  Utrumque  ex  fide  manat.  Nam  de  puro  corde