27:253  253  SUR  LE  DEUTER.  CHAP.  XIII.  254  nous  faut  estre  bien  asseurez  de  nostre  religion:  car  de  mettre  un  homme  a  mort  sans  avoir  cogneu  quel  est  le  vray  Dieu,  ce  seroit  un  zele  enrage.  Comme  nous  voyons  auiourd'huy  les  Papistes,  et  de  tout  temps  on  a  veu  les  Payens  qui  en  ont  ainsi  use:  et  mesmes  entre  les  Iuifs  ceste  loy  a  este  bien  mal  prattiquee  contre  les  Prophetes.  Et  c'a  este  a  ce  tiltre  que  nostre  Seigneur  Iesus  et  ses  Apostres  ont  endure  persecution.  Or  les  payens,  quand  ils  ont  fait  des  loix,  qu'on  gardast  la  facon  de  faire  qui  estoit  establie  entre  eux,  ils  ont  eu  un  bon  principe,  et  un  bon  fondement  en  cela:  car  ce  n'est  point  assez,  que  les  Magistrats  facent  des  loix  pour  empescher  qu'on  ne  desrobe,  qu'on  ne  tue,  qu'on  ne  frappe:  mais  ils  ont  cogneu  que  c'estoit  raison  que  Dieu  allast  devant.  Or  si  nature  leur  a  enseigne  cela:  quelle  excuse  y  aura-il,  que  nous  qui  faisons  profession  de  Chrestiente,  dirons  que  c'est  assez  qu'on  empesche  qu'il  ne  se  commette  point  de  larrecins,  ou  d'adulteres,  ou  de  meurtres,  ou  d'autres  violences,  et  des  outrages  qui  nuisent  a  quelcun:  et  que  cependant  on  ne  tienne  conte  de  Dieu?  Ou  sera-ce  aller?  Les  Payens  donc  ont  eu  un  bon  principe,  quand  ils  ont  cogneu  qu'il  falloit  qu'en  une  bonne  police  la  religion  fust  gardee,  et  que  si  quelcun  atten  toit  a  l'encontre,  qu'il  fust  chastie,  et  mesmes  c'estoit  un  crime  capital:  et  cela  a  este  observe  quasi  par  tout  le  monde,  et  en  tout  temps:  les  Iuifs  n'ont  pas  mal  fait,  quand  apres  que  Dieu  leur  avoit  donne  ceste  loy,  ils  ont  eu  zele  a  punir  les  faux-prophetes.  Et  auiourd'huy  quand  les  Papistes  diront  qu'il  faut  punir  les  heretiques  :  cela  est  vray,  nous  confessons  qu'ils  le  meritent.  Mais  cependant  il  falloit  venir  a  cest  article  qui  est  ici  contenu  :  c'est  assavoir  que  nous  ayons  cogneu  quel  est  le  Dieu  auquel  nous  servons,  que  nous  soyons  bien  asseurez  que  ce  n'est  point  a  l'aventure  que  nostre  religion  a  este  publiee:  mais  que  nous  tenons  la  verite  infallible  que  Dieu  nous  a  envoyee,  et  qu'on  nous  l'annonce  en  son  nom,  et  en  son  authorite:  que  c'est  en  luy  que  nostre  foy  est  fondee.  Il  nous  falloit  (di-ie)  la  venir.  Or  les  Papistes  s'abrutissent  la  dessus,  qu'il  leur  semble  qu'en  se  fermant  les  yeux  ils  pourront  executer  leur  rage,  et  furie  contre  les  innocens.  Et  voila  comme  les  Payens  en  ont  abuse.  Car  pource  qu'il  falloit  maintenir  la  religion,  sans  discerner  ce  qu'ils  faisoyent,  s'il  estoit  bon,  ou  mauvais,  ils  se  sont  eslevez  contre  les  serviteurs  de  Dieu.  Autant  en  ont  fait  les  Iuifs  contre  les  Prophetes.  Voila  donc  un  poinct  qu'il  nous  faut  poiser  pour  toute  nostre  vie:  c'est  que  nous  ayons  cogneu  quel  est  le  vray  Dieu,  et  que  nous  puissions  condamner  a  bon  droict,  et  sans  aucun  scrupule  les  erreurs,  esquels  on  nous  voudra  attirer:  ce  qui  se  fera,  quand  nous  aurons  la  clarte  de