55:252  lignum:  quia  non  potuit  tale  piaculum  impleri  nisi  in  cruce.  Ergo  optime  expressit  Petrus,  mortem  Christi  fuisse  sacrificium  expiandis  peccatis  nostris:  quoniam  cruci  affixus,  et  se  hostiam  pro  nobis  offerens,  reatum  nostrum  et  poenam  in  se  susceperit.  Iesaias  (53,  5),  ex  quo  summam  eius  doctrinae  sumpsit  Petrus,  pluribus  utitur  loquendi  formis:  quod  percussus  fuerit  manu  Dei  propter  scelera  nostra,  vulneratus  fuerit  propter  iniquitates  nostras:  quod  afflictus  et  contritus  nostra  causa  fuerit:  quod  castigatio  pacis  nostrae  illi  fuerit  imposita.  Sed  Petrus  idem  exprimere  voluit  hoc  verbo:  nempe,  hac  lege  nos  fuisse  reconciliatos  Deo,  quia  apud  eius  tribunal  Christus  se  vadem  ac  reum  pro  nobis  constituit,  ut  poenam  solveret  cui  obstricti  eramus.  Hoc  beneficium  sophistae  in  suis  scholis,  quantum  possunt,  obscurant:  nam  mortis  Christi  sacrificio  nos  tantum  a  culpa  post  baptismum  liberari  garriunt,  poenam  vero  satisfactionibus  redimi.  Sed  Petrus,  quum  dicit  ipsum  tulisse  peccata  nostra,  non  modo  culpam  illi  imputatam  fuisse  intelligit,  sed  poena  quoque  defunctum,  ut  vere  hoc  modo  esset  expiatrix  victima:  secundum  illud  prophetae  :  Castigatio  pacis  nostrae  super  eum.  Si  excipiant,  hoc  duntaxat  ante  baptismum  valere:  circumstantia  loci  eos  refellit,  quia  sermo  ad  fideles  dirigitur.  Caeterum  hoc  membrum,  et  quod  proxime  sequitur,  livore  eius  sanati  estis,  praesenti  quoque  instituto  accommodari  potest:  quod  scilicet  humeros  nostros  ferendis  aliorum  peccatis  supponere  nos  deceat,  non  ad  peragendam  eorum  expiationem,  sed  tantum  ut  onus  nobis  impositum  feramus.  Peccatis  mortui.  Alterum  finem  prius  notaverat,  nempe  tolerantiae  exemplum:  sed  hic  (ut  dictum  est)  latius  patet,  ut  sancte  et  iuste  vivamus.  Utriusque  mentionem  aliquoties  facit  scriptura:  nempe  quod  aerumnis  et  rebus  adversis  nos  Dominus  exerceat,  ut  configuremur  morti  Christi:  deinde  quod  in  morte  Christi  crucifixus  sit  vetus  homo  noster,  ut  in  novitate  vitae  ambulemus.  Quamquam  hic  finis,  de  quo  loquitur,  non  tantum  a  priore  differt,  ut  genus  a  specie.  Nam  in  patientia  simplex  erat  exemplum.  Quum  autem  passum  esse  Christum  dicit,  ut  peccatis  mortui,  iustitiae  vivamus.  Hanc  vim  subesse  morti  Christi  significat,  ut  carnem  nostram  mortificet,  quemadmodum  fusius  tractat  Paulus,  ad  Romanos  capite  6.  Neque  enim  hoc  tantum  boni  nobis  contulit,  quod  Deus  gratis  nos  iustificat,  non  imputando  peccata:  sed  quod  mundo  et  carni  morimur,  ut  resurgamus  in  novam  vitam.  Non  quod  mortem  istam  dies  unus  perficiat:  sed  quia  ubicunque  viget  mors  Christi  ad  expianda  peccata,  simul  in  carnis  mortificatione  est  efficax.  25.  Eratis  enim  tanquam  oves.  Hoc  etiam  mutuatus  est  Petrus  ex  Iesaia:  nisi  quod  propheta  universalem  sententiam  ponit:  omnes  quasi  oves