51:252  nous  soyons  dediez  a  nostre  Dieu,  et  que  nous  soyons  separez  des  corruptions  de  ce  monde,  comme  nous  avons  veu  aux  Galatiens,  qu'il  dit  que  nostre  Seigneur  Iesus  Christ  est  venu  a  ceste  fin-la,  que  nous  soyons  dediez  par  son  sang  a  ce  que  nous  rendions  maintenant  obeissance  avec  toute  purete  a  Dieu  son  Pere.  Et  (comme  il  dit  en  l'autre  passage)  nous  ne  sommes  point  appelez  a  immondicites  mais  a  iustice:  tellement  que  le  nom  de  Dieu  soit  honore  et  glorifie  par  nous.  Yoila  donc  en  somme  ce  que  nous  avons  a  retenir  de  ceste  preface,  a  fin  que  nous  soyons  tant  mieux  preparez  a  recevoir  la  doctrine  qui  est  contenue  en  ceste  Epistre,  et  qu'aussi  elle  ait  son  authorite  envers  nous  selon  qu'elle  merite  :  et  qu'outre  cela  elle  soit  rendue  amiable,  et  que  nous  scachions  que  c'est  nostre  souverain  bien  que  d'estre  enseignez  par  S.  Paul,  entant  qu'il  nous  est  tesmoin  de  la  grace  de  nostre  Seigneur  Iesus  Christ,  et  qu'il  nous  amene  a  Dieu  pour  estre  reconciliez  a  luy,  au  lieu  que  de  nature  nous  sommes  enfans  d'ire.  Et  puis  apres,  que  nous  puissions  estre  agreables  a  Dieu,  tellement  que  nous  ayons  la  hardiesse  de  l'invoquer  comme  nostre  Pere:  et  que  nous  soyons  asseurez  aussi  qu'il  nous  repute  pour  ses  enfans.  La  dessus  il  use  d'une  action  de  graces  pour  eslever  les  coeurs  de  tous  a  cognoistre  combien  ils  sont  tenus  et  obligez  envers  Dieu:  voire,  attendu  qu'il  s'est  monstre  si  liberal  envers  eux  et  qu'il  s'est  eslargi  en  toutes  sortes.  Benit  soit  Dieu  (dit-il)  et  Pere  de  nostre  Seigneur  Iesus  Christ,  lequel  nous  a  benits  en  toutes  benedictions  spirituelles  es  choses  celestes,  ou  aux  lieux  celestes,  en  Christ.  S.  Paul  a  regarde  en  premier  lieu,  d'autant  que  le  principal  sacrifice  que  Dieu  demande,  c'est  que  ses  benefices  soyent  recognus  des  homines,  qu'ils  luy  en  facent  hommage,  que  cela  les  doit  inciter  a  faire  leur  devoir  :  car  nous  y  sommes  tant  lasches  que  c'est  une  horreur.  Nous  confessons  bien  que  nostre  principal  estude  se  doit  appliquer  la,  pour  avoir  une  vie  bien  reiglee:  c'est  a  scavoir,  de  louer  Dieu.  Car  si  on  demande  pourquoy  nous  sommes  en  ce  monde,  pourquoy  Dieu  a  un  tel  soin  de  nous,  pourquoy  nous  sommes  nourris  de  sa  bonte:  brief,  que  tant  de  biens  qu'il  nous  fait,  nous  crevent  quasi  les  yeux:  c'est  a  fin  que  nous  luy  en  facions  quelque  recognoissance.  Car  (comme  il  est  dit  au  Pseaume)  nous  ne  luy  pouvons  apporter  nul  profit  de  nostre  coste,  et  aussi  il  ne  demande  autre  eschange  que  ceste  action  de  graces,  comme  il  est  dit  au  Pseaume  116,  Qu'est-ce  que  ie  rendray  a  Dieu,  ayant  receu  tant  de  biens  de  luy,  sinon  que  ie  prendray  le  calice  de  salut  et  invoqueray  son  nom?  Voila  donc  tout  ce  que  nous  pouvons  apporter  a  Dieu,  c'est  que  nous  confessions  tenir  tout  de  luy.