5:252  animadvertere  ex  elogio  licet,  quo  ab  evangelista  describuntur:  Multi,  inquit  (Ioann.  12,  42),  ex  principibus  crediderunt  in  eum,  sed  propter  Pharisaeos  non  confitebantur,  ne  eiicerentur  e  synagoga.  Dilexerunt  enim  magis  gloriam  hominum,  quam  gloriam  Dei.  O  exitialem  gloriae  appetentiam!  Nam  si  ab  hominum  probris  auspicanda  est  gloria,  quam  apud  Deum  exspectamus,  quid  iis  futurum  est,  qui  hominum  se  quam  Dei  iudicio  approbare  malunt?  Et  si  Domini  sententia  pronunciatum  est,  eos  in  futurum  saeculum  animam  suam  perdere,  qui  in  hoc  salvam  habere  velint  (Matth.  10,  39;  Luc.  9,  24):  quanto  id  in  gloriam  cadit  aptius,  cuius  longe  sit  facilior  quam  vitae  iactura?  Porro  si  ab  iis  se  velle  sanctificari  declaravit  (Ies.  8,  13),  quibus  se  in  sanctificationem  pollicetur  futurum:  quid  de  se  sperare  ausint,  qui  eius  non  tanti  dignantur  sanctificationem,  quam  vel  [pag.  17]  mediocri  opinionis  suae  imminutione  redimant?  Quod  vero  de  hac  confessione  ad  praesentem  locum  proprie  attinet,  sit  extra  controversiam  istud  positum,  quod  minime  dubiis  verbi  Dei  testimoniis  luculenter  evictum  est:  non  oris  modo  abiuratione  violari  ipsam  ac  labefactari,  sed  externa  quoque  omni  impiarum  superstitionum  simulatione:  ac  quavis  verae  religionis  profanatione.  Quamobrem  eum  qui  sincero  pietatis  studio  afficiatur,  non  linguam  modo  ab  impiis  vocibus,  sed  partes  omnes  corporis,  a  sacrilego  omni  ritu  continentes  habere  oportet.  Verum  quoniam  permulti  (ut  supra  commemoravimus)  qui  christianam  pietatem,  si  ullis  idolorum  abominationibus  commisceatur,  dissipari  atque  everti  nihilo  minus  quam  nos  fatentur,  a  papisticis  tamen  sacris  (sacrilegis  quidem  illis  et  profanis,  sed  quae,  ut  aiunt,  Dei,  non  idolorum  titulum  prae  se  ferunt)  non'  perinde  hodie  nobis  abhorrendum  censent:  refellendus  est  hoc  loco  nobis  eorum  error,  et  quod  polliciti  sumus,  ex  rerum  praesentium  collatione,  cum  eorum  temporum  statu,  quibus  illa  quae  ex  divinis  literis  protulimus  scribebantur,  ostendendum,  non  minus  esse  in  caeremoniis  quibusdam  papisticis  anathematis,  quam  in  ullis  unquam  idolorum  abominationibus.  Ac  de  ea  quidem,  quam  causantur,  discriminis  ratione,  postea  viderimus:  hoc  modo  inter  nos,  quod  dico,  prius  constiterit,  nullum  unquam  in  gentium  superstitionibus  magis  exsecrabile  exstitisse  sacrilegium,  et  quod  veram  pietatem  vel  opprimeret  gravius,  vel  contumeliosius  afficeret,  quam  sunt  hodie  nonnulla  quae  passim  in  regno  papae  visuntur.  Quanquam  autem,  si  aliquando  dederit  Dominus  ut  ad  plenum  repurgentur  ecclesiae,  quas  praestigiarum  ille  antistes  suis  imposturis  corrupit,  non  alia  melior  futura  sit  moderationis  ratio,  quam  ut  a  radice  evellantur  universa,  et  una  (ut  dicitur)  litura  corrigantur,  quae  ex  eius  disciplina  prodierunt.  Non  tamen  sunt  eiusmodi  ex  iis  quaedam,  quin  tu  ea  ad  tempus  tolerare,  atque  una  cum