49:252  suam  tyrannidem  stabilire  moliuntur,  qui  dominatum  in  conscientias  exercent.  6.  Propterea  enim  tributa  quoque.  Per  occasionem  de  tributis  mentionem  ingerit,  quorum  rationem  deducit  ab  ipso  magistratuum  officio.  Nam  si  eorum  sunt  partes,  proborum  tranquillitatem  tueri  ac  conservare  illaesam,  sceleratisque  improborum  conatibus  sese  opponere:  id  facere  non  possunt  nisi  potentia  et  firmis  praesidiis  adiuti.  Iure  ergo  penduntur  tributa  ad  sustinendos  tam  necessarios  sumptus.  Caeterum  de  modo  vectigalium  seu  tributorum  non  est  praesentis  loci  fusius  disserere.  Neque  nostrum  est  vel  principibus  praescribere,  quantum  in  res  singulas  impendant,  vel  eos  ad  calculum  vocare*  Meminisse  tamen  eos  decet,  quidquid  habent  a  populo,  velut  publicum  esse  bonum,  non  privatae  libidinis  ac  luxuriae  instrumentum.  Videmus  enim  in  quos  usus  destinet  Paulus  quae  penduntur  tributa,  nempe  ut  ad  suorum  defensionem  praesidio  instructi  sint  reges.  7.  Reddite  ergo  omnibus  quod  debetur.  Videtur  mihi  apostolus  hic  summatim  velle  comprehendere  quibus  in  rebus  sita  sint  subditorum  erga  magistratus  officia:  nempe  ut  ipsos  in  pretio  ac  honore  habeant,  ut  eorum  pareant  edictis,  legibus,  iudiciis:  ut  tributa  et  vectigalia  persolvant.  Sub  nomine  timoris  obedientiam  significavit:  per  v  e  c  t  i  g  a  l  i  a  et  t  r  i  b  u  t  a  ,  non  portoria  modo  et  indictiones,  sed  alios  quoque  reditus.  Confirmat  autem  hic  locus  quod  prius  dixit,  parendum  esse  regibus  et  quibuslibet  praefectis,  non  quia  cogimur,  sed  quia  Deo  gratum  est  obsequium.  Non  enim  modo  timeri  vult,  sed  voluntaria  quoque  observantia  coli.  8.  Nemini  quidquam  debeatis,  nisi  ut  invicem  diligatis.  Qui  enim  diligit  alterum,  legem  implevit.  9.  Illud  enim  non  moechaberis,  non  occides,  non  falsum  testimonium  dices,  non  concupisces:  et,  si  quod  est  aliud  praeceptum,  in  hoc  sermone  comprehenditur:  Diliges  proximum  sicut  te  ipsum.  10.  Dilectio  proximo  malum  non  infert.  Plenitudo  legis  est  dilectio.  8.  Nemini  quidquam  debeatis.  Sunt  qui  dici  istud  non  sine  ironia  putent:  ac  si  responderet  eorum  obiectioni  Paulus,  qui  gravari  Christianos  contenderent  quod  ipsis  alia  quam  dilectionis  praecepta  iniungerentur.  Et  certe  non  nego  quin  ironice  possit  accipi:  ut  iis,  qui  nullam  aliam  quam  dilectionis  legem  admittunt,  concedat  suum  postulatum  :  sed  alio  sensu.  Ego  tamen  simpliciter  accipere  malo,  quia  existimo,  Paulum  istam  de  magistratuum  potestate  praeceptionem,  ne  cui  infirma  videretur,  voluisse  ad  dilectionis  legem  referre:  ac  si  dixisset:  Quum  postulo  ut  principibus  pareatis,  non  aliud  requiro  quam  quod  ex  lege  dilectionis  debent  praestare  omnes  fideles.��  Nam  si  bonis  bene