41:252  bellum  adferre.  Rex  quum  videret  illum  hominem  barbarum  tam  praecise  agere,  non  ausus  est  amplius  tergiversari,  et  dixit  se  fore  in  potestate  senatus,  et  subito  discessit.  Haec  historia  nunc  describitur  ab  angelo.  Nondum  res  gesta  erat,  sed  Deus  proposuit  ante  oculos  piorum  id  quod  tunc  occultum  erat,  et  quod  erat  etiam  praeter  omnium  opinionem.  Reddit  igitur  causam  angelus,  cur  illa  expeditio  Antiochi  dissimilis  proximae  futura  esset:  quoniam  venient^  inquit,  naves  Cithim,  id  est,  italicae,  et  dolebit,  et  revertetur,  hoc  est,  parebit  quamvis  indigne  ferat  tam  imperiose  secum  agi,  et  se  cogi  in  ordinem  non  sine  ignominia.  Erat  enim  hoc  indignum  rege,  tam  civiliter  se  deiicere  ad  verbulum  unum.  Hinc  indignatio,  sed  tamen  revertetur,  et  indignabitur  contra  foedus  sanctitatis,  hoc  est,  convertet  suam  rabiem  in  templum  Dei  et  urbem.  Et  hic  secundus  reditus  longe  plus  cladis  intulit  Iudaeis  quam  prior.  Noluerat  quidem  reverti  Antiochus  in  patriam,  nisi  praeda  aliqua  ditatus,  quum  simulasset  pacem,  sed  nunc  quum  coactus  esset  abire  cum  tanta  contumelia,  exarsit  in  maiores  furias.  Et  ideo  atrocius  se  gessit  in  populum  Dei  et  templum  eius.  Et  ideo  dicit  angelus,  indignabitur  contra  foedus  sanctum,  et  faciet  et  revertetur.  Secundo  loco  repetit  idem  verbum,  quasi  diceret,  rebus  infectis  Antiochum  venturum  in  Syriam,  quia  parebit  senatui  romano,  vel  potius  veteri  suo  patrono  quem  coluerat.  Caeterum  diximus  et  fusius  postea  explicandum  erit,  cur  angelus  praedicat  regis  furorem  conversum  iri  adversus  foedus  sanctum,  ne  scilicet  labefactetur  fides  piorum,  ubi  videbunt  tantum  divinitus  concedi  tyranno,  ut  templum  spoliet.  Postea  adiungit,  Et  intelliget  ad  desertores  foederis  sanctitatis.  Modum  etiam  angelus  designat,  quod  scilicet  occultae  erunt  pactiones  inter  Antiochum  et  inter  apostatas,  qul  deserent  sanctum  Dei  foedus.  Constat  autem  accitum  fuisse  Ierosolymam  ab  Iasone  primum,  deinde  a  Menelao.  Ego  breviter  perstringo  quae  ad  historiam  pertinent.  Nam  hinc  inde  colligo  quae  exstant  passim  apud  profanos  scriptores,  sed  totus  liber  Machabaeorum  huc  spectat,  ut  nobis  statuat  ante  oculos  quaecunque  angelus  hic  praedicit.  Ergo  quisquis  volet  cum  fructu  legere  haec  vaticinia,  necesse  est  ut  se  exerceat  in  libris  illis,  et  memoriter  etiam  teneat  totam  illam  historiam.  Onias  senior  erat  vir  sanctus:  de  filio  prius  dictum  fuit.  Ille  enim  ut  se  eximeret  ab  insidiis  profectus  est  in  Aegyptum,  et  templum  exstruxit,  quemadmodum  narrat  etiam  Iosephus,  et  praetexuit  locum  illum  Isaiae,  Erit  altare  Deo  in  Aegypto.  Onias  autem  senior,  qui  functus  fuerat  sancte  et  fideliter  munere  sacerdotali,  coactus  fuit  fugere:  tandem  interfectus  est.  Iason  qui  ab  ipso  missus  fuerat  ad  placandum  Antiochum,  sacerdotio  se  ornavit,  prodidit  templum  et  totam  gentem  suam  una  cum  cultu  Dei.  Postea  retulit  mercedem  qua